Qurbandyqtar sany 70 adamnan asty
Nıgerııanyń astanasyndaǵy avtovokzalda jasalǵan eki jarylys saldarynan qaza tapqandar sany, sońǵy derekter boıynsha, 71 adamǵa jetti. 124 adam túrli deńgeıde dene jaraqatyn aldy delinip otyr. Barlyq zardap shekkender aýrýhanalarǵa jetkizilgen. Budan bólek, jarylystardan 40 avtobýs búlingen.
El astanasy – Abýdje qalasyndaǵy qosarlanǵan terrorlyq akt 14 sáýir, dúısenbi kúni erteńgisin jasalǵan bolatyn. Ázirshe lańkestikke jaýapkershilikti eshqandaı terrorlyq uıym óz jaýapkershiligine ala qoıǵan joq. Biraq, sarapshylardyń pikirinshe, jarylystarǵa «Boko Haram» terrorlyq uıymy radıkaldy ıslamısteriniń qatysy bolýy yqtımal. «Boko Haram» jasaqtary 2009 jyldan beri eldiń soltústik aýdandarynyń táýelsizdigi úshin kúres júrgizip keledi.
Indonezııanyń alǵashqy prezıdent ushaǵy
Amerıkanyń «Boıng» ushaq jasaý konserni Indonezııa tarapyna jańa VVJ2 jolaýshylar ushaǵyn paıdalanýǵa berdi. Bul ushaq endi Indonezııa prezıdentin tasıtyn bolady. «Boıng 737-800» jolaýshylar laıneri bazasynda jasalǵan ushaqtyń quny 89,6 mıllıon dollar turady.
Buǵan deıin el bıligi prezıdenttiń saparlaryn qamtamasyz etý úshin Garuda Indonesia áýe kompanııasynan ushaqtardy jalǵa alyp kelgen kórinedi. Indonezııa mınıstrler kabınetiniń hatshysy Sýdı Sılalahıdiń sózine qaraǵanda, bul el osydan 69 jyl buryn Nıderlandtan táýelsizdik alǵan kezeńnen bergi alǵashqy prezıdenttik ushaq bolyp tabylady. Atalǵan ushaq 50 jolaýshyny alyp usha alady. Ol keńes ótkizetin jáne demalatyn birneshe bólmelermen jabdyqtalǵan.
Jırınovskııdiń kezekti kúlkili qylyǵy
Reseı lıberal-demokratııalyq partııasynyń serkesi Vladımır Jırınovskıı keshe Memlekettik dýmanyń plenarlyq májilisine Reseı qarýly kúshteri polkovnıginiń formasyn kıip kelgen. Kóptegen depýtattar keıde aýzyna ıe bola almaı, artyqtaý sóılep qoıatyn atyshýly parlamentarııdiń sýretin ózderiniń Twitter-lerinde ornalastyryp, máz bolǵanǵa uqsaıdy.
Máselen, depýtat Svetlana Jýrova bylaı dep jazypty: «Búgin Vladımır Volfovıch Dýmada ádemi sóz sóıledi. Minberde kamýflıajben turǵan ózine qatty jarasady eken». Al Robert Shlegel: «Komandante minberdi bir oq shyǵarmastan basyp aldy», dep qaǵytypty. Vladımır Volfovıchtiń ózi bolsa, májilis aldynda jýrnalısterge bylaı dep túsinik beripti: «Búgin men zań boıynsha kıip júrýge quqym bar polkovnık formasyn kıip keldim. Munyń esh sókettegi joq qoı dep oılaımyn».
Joǵalǵandy tabýdan úmit úzer emes
О́tken aıdyń 8 naýryzyna qaraǵan túni Malaızııanyń astanasy Kýala-Lýmpýr qalasynan ushyp shyǵyp, Qytaı astanasy Beıjiń qalasyna baǵyt alǵan, biraq kúni búginge deıin iz-túzsiz joǵalyp ketken malaızııalyq «Boıng 777-200» jolaýshylar ushaǵyn izdestirý áli de jalǵasyp jatyr.
Izdeý nátıjesinde Úndi muhıtynda munaı daǵy tabylǵan bolatyn. Izdeý sharalary da sol mańda jalǵastyrylyp jatyr. Alaıda, aldymen bul daqtyń qaıdan shyqqanyn, bul jerde qaıdan paıda bolǵanyn anyqtaý qajet, deıdi Avstralııada oryn tepken izdestirýdi úılestirý ortalyǵynyń basshysy Angýs Hıýston. Onyń sózine qaraǵanda, «qara jáshikter» bir aptadan beri qandaı da bir belgi berýdi toqtatqan. Sondyqtan joǵalǵan ushaqty izdestirý jumystary da qıyndaı túspek. Qysqasy, izdeýshiler ishinde kóptegen jolaýshylary bolǵan áýe kemesin tabýdan úmit úzbeımiz deıdi.
Mekteptiń jabylýyna jylandar kináli
Qyrǵyzstannyń Osh oblysyndaǵy Birinshi mamyr aıylyndaǵy jergilikti mektepte oqý toqtatylǵan. Oǵan oqý ornynda jylandardyń kóptep paıda bolýy sebep bolǵan. Derek kóziniń málimetinshe, kúnine mektepte 20-30 jylanǵa deıin paıda bolady eken.
«Azattyq» radıosynyń habarlaryna qaraǵanda, jylandar oqýshylar men muǵalimderge ábden qaýip tóndirýi yqtımal kórinedi. Ondaǵan jylandy mektep janynan kórgender de bar eken. Jergilikti turǵyndar sanepıdemııalyq qyzmet pen veterınarııa basqarmasyna kómek surap barsa, olar járdemdese almaıtyndaryn aıtypty. Keshe keshkisin aıylǵa oblystyq TJM basqarmasynyń bastyǵy Daıyrbek Karımov baryp, máseleni oqıǵa ornynda sheshýge kirisken syńaıly. Atalǵan mektepte 150 bala bilim alady eken. Al mazany qashyrǵan jylannyń qaı túri ekeni naqtylanbaıdy.
Bankti 89 mln. rýblge aldaǵan alaıaq
Máskeý polısııasy bankti 89 mln. rýblge aldaǵan Cheshenstan turǵynyn ustaǵan. Bul týraly Reseı Federasııasynyń Ishki ister mınıstrligi habarlady. Tergeý nusqasyna qaraǵanda, 57 jastaǵy er adam jalǵan qujatty paıdalanyp, bankterdiń birinen 89 mln. rýbl kredıt alypty. Aıyptalýshy syrttaı alty jylǵa bas erkinen aıyrylý jazasyna kesilse kerek.
Osydan keıin kúdikti iz jasyrýǵa áreket jasaǵan. Iаǵnı, ol plastıkalyq hırýrgııanyń kómegimen óziniń syrtqy bet-beınesin ózgertken. Onyń ústine, basqa adamnyń atyndaǵy jalǵan qujatty paıdalanǵan. Kúdikti búkil Reseı aýmaǵy boıynsha bir jyl boıy izdestirilipti. Sóıtip, ol 15 sáýirde Máskeýde qolǵa túsken. Operasııaǵa Máskeýdegi kóptegen quqyq qorǵaý organdarynyń jasaqtary qatysqan. Ishki ister mınıstrligindegilerdiń habarlaýynsha, kúdiktiden basqa bireýdiń atyna resimdelgen jalǵan tólqujat tabylǵan.
Qysqa qaıyryp aıtqanda:
Reseı ishki ister mınıstrliginiń tergeý departamenti Federaldy shekarany jabdyqtaý jónindegi agenttiktiń burynǵy basshysy Dmıtrıı Bezdelovqa izdeý jarııalady. Oǵan óziniń sybaılastarymen 1 mıllıard rýbl urlady degen kúdik keltirilip otyr. Aqsha Abhazııa shekarasynda beket salý úshin bólinipti.
Nıderlandtyń Ossa qalasynda qarańǵyda jaryq berip turatyn alǵashqy 500 metrlik jol salyndy. Jol qarańǵyda kúndiz kún jaryǵynan alǵan energııasymen jaryq berip turady eken. Ony salǵan «Roosegaarde Heijmans Infrastructure» kompanııasy jolǵa elektromobılderdi zarıadtaıtyn arnaıy ındýksııaly jabylǵy tóseýdi de josparlap otyrǵan kórinedi.
AQSh-tyń Kolorado shtatyndaǵy Eıvone qalasynda medısınalyq maqsatta marıhýana satatyn alǵashqy avtomat paıda boldy. «Emdik» esirtkini arnaıy tirkeý kartalary bar pasıentter ǵana satyp ala alady eken. Kolorado marıhýanany medısınalyq maqsatta ósirýge, satýǵa jáne paıdalanýǵa bolatyn alǵashqy shtat sanalady.
Internet materıaldary negizinde ázirlendi.