Jaqynda belgili jazýshy, halyqaralyq «Alash» ádebı jáne PEN-klýb syılyqtarynyń laýreaty Qýanysh Jıenbaıdyń mereıli belesine oraı, elordadaǵy Ulttyq akademııalyq kitaphanada shyǵarmashylyq portreti týraly esseler, maqalalar jáne suhbattar toptastyrylǵan «Araldyń aqjal tolqyny» atty kitaptyń tanystyrylymy ótti.
Mazmundy is-sharada ádebıet álemine ótken ǵasyrdyń sekseninshi jyldary kelip, «Dańq túrmesiniń tutqyny», «Án salýǵa áli erte», «Jer ústinde de jumaq bar» jáne «Ol sapardan oralmasyn bilgen-di» atty tórt roman men birneshe povest, áńgime jazǵan talantty prozashy týraly Qazaqstan Prezıdentiniń keńesshisi Baýyrjan Omaruly, Parlament Májilisiniń depýtaty Saýytbek Abdrahmanov, sondaı-aq Marat Májıtov, Mádı Aıymbetov, Qýandyq Túmenbaı, Súleımen Mámet, Sharhan Qazyǵul, Amantaı Shárip, Aıgúl Kemelbaeva jáne t.b. qalamgerler sóz alyp, parasatty oı órbitti.
Ádebı is-shara barysynda jazýshy, Memlekettik syılyqtyń laýreaty Aldan Smaıyl sýretkerdiń «Jer ústinde de jumaq bar» romanyndaǵy Baıqońyr tragedııasyna toqtala kelip: «Men bul tragedııany bala kúnimnen bilemin. Sonyń saldarynan bir jyldary Arqa dalasynda kıikter jappaı qyrylyp qaldy. Qýanyshty Baıqońyr tragedııasyn qalamyna arqaý etken birden-bir jazýshy dep baǵalaımyn. Bul ózekti máseleni qalaı sheshemiz dep, oǵan memlekettik deńgeıde nazar aýdarý qajet. Onyń osy problemany kótergen romany da óziniń laıyqty baǵasyn alǵan joq», − dese, jazýshy Álibek Asqarov: «Qalamger qaýymynda ishteı bir týysqandyq, janashyrlyq bolady. Sonyń ishinde qurdastardyń orny bólek. «Qýandyq ne jazyp júr?», «Qýanysh ne istep jatyr?» dep eleńdep turamyz. Bizdiń aldymyzdaǵy býyn ádebıettiń de, shyqqan kitaptarynyń da qyzyǵyn kórdi. Al biz «endi durystap kitap jazaıyq» degende «qaıta qurýǵa» tap kelip, qalamymyzdy kóp silteı almaı qaldyq. Osy turǵydan kelgende Qýanysh ónimdi eńbek etip, aq paraq pen qalamyna adal boldy», dedi.
Sondaı-aq Qazaqstan Jazýshylar odaǵy tóraǵasynyń birinshi orynbasary, aqyn Aqberen Elgezek te sóz alyp, Odaq atynan mereıtoı ıesine syı-qurmet kórsetti. Kesh tizginin ustaǵan tanymal satırık Kópen Ámirbek ázil sózimen jınalǵan qonaqtardyń ezýin jıǵyzbady. Jyrshy Elmura Jańabergenova jyrdan shashý shashty.