Sonaý Keńes ókimeti kezinde poshta qyzmeti úlken bedelge ıe bolatyn. Onyń ózindik sebebi de bar edi. Barlyq habar-oshar, merzimdi baspasóz halyqqa osy sala arqyly taraıtyn. О́zimiz kórgendeı, aýyl adamdary poshtanyń kelýin asyǵa kútetin.
Zaman ózgerdi. Baılanystyń jetildirilgen túri damydy. Shyndyǵy kerek, qazir adamdar bir-birine hat jazyp jatpaıdy, barlyǵy ǵalamtor arqyly atqarylýda.
Alaıda, munymen poshta qyzmeti zaman aǵymyna ilese almaı qalyp jatyr degen túsinik týmaýy qajet. Poshta qyzmetine aýyldyq jerlerde áli de suranys qalyptasyp otyr. Aýdandardyń poshta bólimshelerinde zeınetaqy men járdemaqy, basqa da tólemder júzege asyrylýda.
Degenmen, elimizde sońǵy kezderde «Qazposhta» qyzmetiniń tómendigi, onyń jumysyn jetildirý jóninde áńgimeler jıi aıtyla bastady. Bul másele Parlamenttiń turaqty komıssııasynda da qaraldy.
Biraq elimiz óńirinde yrǵaqty jumys jasap jatqan poshta bólimsheleri bar ekenin aıtqan jón. Sonyń biri – Qaztalov aýdanynyń «Qazposhta» bólimshesi. Biz osy aýdannyń poshta bólimshesiniń bastyǵy Janar Tabyldıevany áńgimege tartqan edik.
– Kúni búginde aýdanda 16 poshta bólimshesi jumys jasasa, osynyń ishinde bireýi jyljymaly qyzmet atqarady. Aýdanymyz oblys ortalyǵynan 300 shaqyrym shalǵaı jatsa, al aýdan ortalyǵynan eldi mekenderdiń qashyqtyǵy 100 shaqyrymnan asady. Ári bularmen qatynas jasaıtyn joldar da tómen dárejede. Biraq osy jaǵdaılarǵa qaramastan gazet-jýrnaldar oblys ortalyǵynan aptasyna 5 ret tasymaldanady. Jalpy, merzimdi baspasózdiń ýaqtyly kelýine aýdan turǵyndary dán rıza.
– Endi jaqynda aýdan turǵyndaryn qýantatyn taǵy bir jumys qolǵa alyndy. Ol – shalǵaıda turatyn adamdarǵa poshta qyzmetin kórsetý úshin arnaıy jabdyqtalǵan avtokóliktiń alynýy. Bul kólikte baılanys, seıf, basqa da qyzmet paıdalanýshylar úshin qajetti jabdyqtar ornatylǵan. Osy jyljymaly avtokóliktiń qyzmetin bul kúnde 500-den astam aýyl turǵyndary paıdalanýda. Nátıjesinde aýdanymyzda birde-bir eldi mekende poshta oryndary jabylǵan joq, – deıdi «Qazposhta» mekemesiniń bastyǵy.
О́zin Baqytqanym Sarıeva dep tanystyrǵan azamatsha aýdan ortalyǵynan 80 shaqyrym jerde shalǵaıda turatynyn aıta kelip, jyljymaly poshta qyzmetiniń jumysyna rıza ekendigin, sebebi, aı saıyn alatyn zeınetaqysyn aýylǵa ýaqtyly ákeletinin jáne sabylyp árli-berli júrmeıtinderin jetkizdi.
Mine, shalǵaı aýdandaǵy poshta qyzmetiniń halyqqa sapaly jumystar jasap jatqanyna osy pikirden-aq oı túıdik.
Temir Qusaıyn,
«Egemen Qazaqstan».
Batys Qazaqstan oblysy,
Qaztalov aýdany.
–––––––––––––––––
Sýrette: poshta qyzmetin atqaratyn jyljymaly avtokólik.