Qazaqstan Qarýly Kúshteri tarıhynda desantshylar tuńǵysh ret túngi jaǵdaıda sý kedergilerin eńsere otyryp júrip otti
Qazaqstan Qarýly Kúshteriniń tarıhynda Aeroutqyr áskerleri tuńǵysh ret túngi jaǵdaıda sýdan ótý qımyldaryn júzege asyrdy. 200-den astam aýyr jáne dóńgelekti tehnıka shynaıy jaýyngerlik jaǵdaıda sý kedergilerin kesip ótti. Osy maqsat úshin ınjenerlik bólimsheler Ile ózenine pontondy kópir qoıdy. Tún qarańǵylyǵynda osy kópirden artıllerııanyń súıemeldeýi arqyly desantty-shabýyldaýshy bólimshelerdiń tehnıkalary júrip ótti. О́zennen ótý qımyldary Aeroutqyr áskerleriniń bólimsheleri qatysqan brıgadalyq-taktıkalyq oqý-jattyǵýlar sheńberinde júrgizildi. Osynyń aldynda ǵana tańǵy saǵat altyda 4 garnızonnyń brıgadalary dabyl boıynsha kóterilgen bolatyn. Birneshe shaqyrymdyq marsh jasaǵan bólimsheler Ile ózeninen ótý úshin lekterdi jasaqtaý aýdanyna toptasty. Osymen bir mezgilde brıgadalyq-taktıkalyq oqý-jattyǵýǵa qatysýshylar parashıýt arqyly tikushaqtan desant túsirýdi júzege asyrdy. Túngi jaǵdaıda ózennen soǵysa júrip ótý jeke quramǵa bilikteri men mashyqtaryn synaqtan ótkizýge, al Aeroutqyr áskerleriniń basshylyǵyna áskerler tobyn basqarýda máselelerdi pysyqtaýǵa múmkindik berdi. Bólimshelerdiń ózara naqty is-qımyldary jáne olardyń shoǵyrlanýy, áskerlerdi saýatty basqarý oqý-jattyǵýdyń osy kezeńiniń joǵary deńgeıde ótýine múmkindik berdi. Sonymen qatar, jeke quram men tehnıkany jaýyngerlik maqsattaǵy aýdanǵa der kezinde jetkizýdi qamtamasyz ete aldy. Oqý-jattyǵýdyń bul kezeńi «Skylark» ushý apparatyn paıdalanýmen júzege asty. Barlaýdyń qazirgi zamanǵy tehnıkalyq quraldaryn qoldaný jerdegi tehnıkany tartpaı-aq jáne jeke quramnyń ómirine esh qaýip tóndirmeı qajetti aqparattyń úlken kólemin alýǵa múmkindik beredi. Brıgadalyq-taktıkalyq oqý-jattyǵýlary Qazaqstan Respýblıkasy Qarýly Kúshteri Qurlyq áskerleriniń jaýyngerlik daıarlyq josparyna sáıkes ótýde. Qazirgi ýaqytta 2,5 myń adamnan turatyn áskerler toby men 500-den astam áskerı tehnıka Almaty oblysyndaǵy Kóktal polıgonyna shoǵyrlandy. Oqý-jattyǵýdyń sheshýshi kezeńi barysynda Aeroutqyr áskerleriniń bólimsheleri shartty qarsylasty qorshaý jáne joıý sııaqty arnaıy áskerı qımyldardy júrgizetin bolady. «Egemen-aqparat».