Qazaqstanda maımylsheshek aýrýyn juqtyrǵandar tirkelgen joq. Bul týraly Densaýlyq saqtaý mınıstrligi málim etti, dep habarlaıdy Egemen.kz.
QR Bas sanıtarlyq dárigeri - Densaýlyq saqtaý vıse-mınıstri Aıjan Esmaǵambetovanyń aıtýynsha, memlekettik shekara arqyly ótkizý oryndarynda sanıtarlyq-karantındik baqylaý júrgizilip jatyr, onyń ishinde qashyqtan termometrııa bar.
Maımylsheshek (monkeypoxes – MPXV) – sırek kezdesetin juqpaly aýrý. Qyzba, jalpy ıntoksıkasııa jáne ekzantemanyń paıda bolýymen sıpattalady (qyzarý). Inkýbasııalyq kezeń – 5-21 kún. Naýqasta dene qyzýynyń joǵarylaýy, deneniń aýyrýy, álsizdik, bórtpe, qusý, lımfa túıinderiniń ulǵaıýy, bas aınalýy baıqalady. Aýrýdyń uzaqtyǵy 2-3 apta.
Maımylsheshek aýrýyn prımattar men kemirgishter (tıinder) sııaqty jabaıy janýarlar taratady. Sondaı-aq ınfeksııa naýqastyń qany nemese onyń bıologııalyq suıyqtyǵy arqyly, aýrý janýardyń etin qoldaný saldarynan juǵýy múmkin. Maımyl sheshegi aýrýy búginde Batys Afrıka elderinde keń taralǵan (Kongo Demokratııalyq Respýblıkasy, Kongo Respýblıkasy, Kamerýn, Ortalyq Afrıka Respýblıkasy, Nıgerııa, Kot-d ' Ivýar, Lıberııa, Serra-Leone, Gabon jáne Ońtústik Sýdan).
Afrıkada syrqattar sany tez ósýde. Resmı aqparat kózderine sáıkes 2016 jyldan bastap 20 esege kóbeıdi. Eń úlken oshaqtar Nıgerııa men Kongoda tirkeldi.