SQO-da «Soltústik óńirlerdegi bos jumys oryndary» jármeńkesi ótip jatyr, dep jazady Egemen.kz.
Munda soltústik oblystardan 3600-ge jýyq bos jumys orny usynyldy. Bul týraly О́ńirlik kommýnıkasııalar qyzmetinde ótken brıfıngte oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Janar Dáýletbaeva habarlady.
«Sońǵy 5 jylda «Eńbek» memlekettik baǵdarlamasy arqyly teriskeıge 735 otbasy qonys aýdardy. Al bıyl 33 januıa soltústikke qonys aýdarý kvotasyna engizildi. Bos jumys oryndarynyń tiziminde muǵalim, dáriger, dánekerleýshi jáne aýyl sharýashylyǵy salasyna qatysty mamandyqtar usynyldy. Teriskeıge bettegen azamattarǵa memleket tarapynan birneshe kómekter kórsetiledi. Atap aıtqanda, otbasy jáne otbasy múshelerine 70 AEK ıaǵnı, 222 600 teńge mólsherinde qarjy beriledi. Turǵyn úıdi jaldaý jáne kommýnaldyq qyzmetter úshin beriletin qarjy kólemi bekitilgen. Iаǵnı, qalalyq jerge qonys aýdarǵany úshin bir adamǵa - 63 600 teńge, otbasy músheleriniń sany ekeýden assa - 79 500 teńge, al bes adamnan kóp bolsa - 95 400 teńge mólsherinde tólenedi», dedi Janar Dáýletbaeva.