Qazaqstan Syrtqy ister mınıstriniń birinshi orynbasary Aqan Rahmetýllın Polsha Syrtqy ister mınıstri Zbıgnev Raýmen kezdesti. Sheteldik dıplomat Eýropadaǵy qaýipsizdik jáne yntymaqtastyq uıymynyń (EQYU) Is basyndaǵy tóraǵasy retinde eki kúndik resmı saparmen Qazaqstanǵa keldi.
Kezdesýde EQYU aıasyndaǵy yntymaqtastyqtyń keń aýqymdy máseleleri talqylandy. Áńgimelesý barysynda Z.Raý Polshanyń Uıymǵa tóraǵalyǵyn qoldaǵany úshin Qazaqstan tarapyna alǵysyn bildirdi.
A.Rahmetýllın Qazaqstannyń aldaǵy ýaqytta da Uıymnyń jumysyna úles qosýǵa daıyn ekenin rastady. Sondaı-aq EQYU-nyń áskerı-saıası, ekonomıkalyq-ekologııalyq jáne gýmanıtarlyq salalaryn júzege asyrýda teńgerimdi kózqaras saqtaý qajettigin atap ótti.
Kún tártibindegi halyqaralyq máselelerdi talqylaı otyryp, taraptar aımaqtaǵy geosaıası shıelenistiń artýyna baılanysty Is basyndaǵy tóraǵalyq aldynda turǵan qıyndyqtarǵa nazar aýdardy. Osy turǵyda dıplomattar Uıymǵa qatysýshy memleketter arasynda qaýipsizdik salasyndaǵy senimdi qalpyna keltirý jáne yntymaqtastyqty nyǵaıtý sharalary týraly pikir almasty.
Sonymen qatar kelissózder kezinde Qazaqstannyń saıası transformasııasy jáne Qazaqstan Konstıtýsııasyna ózgerister men tolyqtyrýlar engizý boıynsha aldaǵy jalpyhalyqtyq referendým da sóz boldy. Syrtqy ister mınıstriniń birinshi orynbasary polshalyq áriptesine «Jańa Qazaqstandy» qurýǵa jáne «Ekinshi Respýblıkany» qalyptastyrýǵa baǵyttalǵan reformalardy júzege asyrý barysy týraly áńgimelep berdi.
Kezdesý sońynda taraptar Qazaqstan men Polshanyń kópjaqty formattaǵy tıimdi yntymaqtastyǵyn atap ótip, dıalogty jalǵastyrýǵa kelisti. Kelissózderden keıin dıplomattar buqaralyq aqparat quraldaryna arnap brıfıng ótkizdi.
«Bıyl biz qos mereıtoıdy atap ótemiz. Qazaqstan Respýblıkasynyń EQYU-ǵa qosylǵanyna jáne elimiz ben Polsha arasynda dıplomatııalyq qatynas ornaǵanyna 30 jyl toldy. Mınıstr Z.Raýdyń sapary osyndaı mereıtoılyq data aıasynda ótýiniń sımvoldyq máni bar», dedi Syrtqy ister mınıstriniń birinshi orynbasary.
«Qazaqstan áskerı-saıası, ekonomıkalyq-ekologııalyq jáne gýmanıtarlyq salalarda EQYU-men belsendi ózara is-qımyl jasaıdy. Elimiz 2010 jylǵy 1-2 jeltoqsanda Astanada EQYU-ǵa qatysýshy elderdiń memleket jáne úkimet basshylarynyń Sammıtin ótkizdi. Biryńǵaı jáne bólinbeıtin Eýro-Atlantıkalyq jáne Eýrazııalyq qaýipsizdik qoǵamdastyǵynyń paıymy belgilengen «Qaýipsizdik qoǵamdastyǵy jolynda» Astana deklarasııasyn qabyldaý arqyly uıymnyń damýyna eleýli úles qosty.
Osy jyldar ishinde dostyq pen senimge negizdelgen qazaqstandyq-polıak seriktestigi nyǵaıyp, oń baǵytta damýyn jalǵastyryp otyr. Buǵan ekijaqty jáne kópjaqty formattaǵy ózara konstrýktıvti árekettestik jáne belsendi saýda-ekonomıkalyq ári ınvestısııalyq yntymaqtastyq dálel bola alady. Polsha – Qazaqstannyń Ortalyq jáne Shyǵys Eýropa óńirindegi mańyzdy jáne perspektıvaly áriptesi. Polshanyń Ortalyq Azııadaǵy negizgi seriktesi bolýǵa degen umtylysymyzdy rastaımyz», dep atap ótti A.Rahmetýllın.