Prezıdent otandyq buqaralyq aqparat quraldarynyń ókilderi úshin ótkizgen brıfıngte referendým joǵary deńgeıde uıymdastyrylǵanyn atap ótti, dep habarlaıdy Egemen.kz.
Memleket basshysy Qasym-Jomart Toqaev elordadaǵy Ál-Farabı atyndaǵy Oqýshylar saraıynyń ǵımaratynda ornalasqan referendým ýchaskesine baryp, daýys bergen edi.
Jalpyulttyq referendým arqyly Konstıtýsııaǵa ózgerister men tolyqtyrýlardyń engizilýi – búgingi asa mańyzdy sharanyń basty ereksheligi. Buǵan deıin Ata zańǵa ózgerister men tolyqtyrýlar engizý jónindegi sheshimdi Parlament qabyldaıtyn.
Memleket basshysy qazaqstandyqtardy ótip jatqan referendýmmen quttyqtady.
«Búgin elimiz úshin, shyn máninde, tarıhı kún. Halqymyz betburysty sheshim qabyldamaq. Eshqandaı májbúrlik joq. Referendým joǵary deńgeıde uıymdastyrylǵan», dedi Qazaqstan Prezıdenti.
Memleket basshysy konstıtýsııalyq reformanyń negizgi maqsattary men mindetterine qatysty jýrnalısterdiń birqatar ózekti saýalyna jaýap berdi.