Jyl sońyna deıin suıytylǵan gazdyń baǵasy qymbattaýy múmkin. Bul týraly Energetıka mınıstri Bolat Aqsholaqov Májiliste ótken Úkimet saǵatynan keıin BAQ ókilderine bergen jaýabynda aıtty, dep habarlaıdy Egemen.kz.
«О́zderińiz bilesizder, tabıǵı gazdyń baǵasyn birlesken buıryqpen bekitip qoıdyq. Ortasha deńgeıde 8 paıyz ósedi. Al, suıytylǵan gazǵa kelsek, jyl sońyna deıin zańdy túrde bekitýge múmkindik joq. Biz ony baqylaýǵa alýdy maqsat etip otyrmyz. Úkimet bizdiń mınıstrlikke, Básekelestikti qorǵaý jáne damytý agenttigine, Ulttyq ekonomıka mınıstrligine osyndaı mindet júktep otyr», dedi B.Aqsholaqov.
Mınıstrdiń aıtýynsha, bul máselede gaz óndirip otyrǵan zaýyttardyń da jaǵdaıyn oılaý qajet.
«Qazir suıytylǵan gazdyń ortasha baǵasy bir tonnasyna 28 myń teńge. Bul, árıne, ózindik qunyn aqtamaıdy. Bekitilgen baǵa 28 myń teńge bolsa, ózindik quny 60-90 myń teńgeniń arasynda qubylady, ár zaýytta árqalaı. Sondyqtan biz ony shamamen kóterýimiz kerek. Kelesi 180 kúndikke suıytylǵan gazdyń baǵasy sál ósýi múmkin. Ol 20 paıyzdan artyq emes. Mysaly, qazir bir tonnasy 28 myń teńge bolsa, 36 myń teńge bolady. Basqasha aıtqanda, kóterme baǵa 1 lıtrge 27 teńgeden bolsa, 29 teńge bolady. Janarmaı quıý stansalaryndaǵy baǵany búkil quziretti organdar baqylaýyna alady. Baǵany negizsiz kóterýge jol berilmeıdi. Ondaı faktiler boıynsha tıisti sharalar qoldanylady», dedi ol.