Oral qalasynda Balalar jyly jáne Halyqaralyq balalardy qorǵaý kúnine oraı «Biz baqytty balamyz erkelegen» atty festıval ótti. Tuńǵysh Prezıdent alańynda ótken merekelik is-sharaǵa 1 500-den astam bala qatysty.
Festıvalde túrli taqyryptyq oıyn alańyna bólingen baldyrǵandar taza aýadaǵy belsendilikti dáriptep, oıyn arqyly mádenıettilikke tartylyp, salamatty ómir saltyn nasıhattady.
«Ǵajap álem» alańynda qalalyq mektepke deıingi uıymdar kishkentaı búldirshinder úshin ulttyq oıyndar, ata-analarmen birlesken sharalar, balǵyndardyń shyǵarmashylyq áleýetin damytý baǵytyndaǵy qoıylymdar ótkizdi.
«Meıirim» alańynda demeýshilerdiń tarapynan balalarǵa merekelik syı jasalyp, oıynshyq pen tátti úlestirildi. Uıymdastyrýshylar «Qorjyn» meıramhanasy, «Sdelaı detıam dobro» birlestigi jáne «Dostyq» oqý ortalyǵy, 125 High School, Respýblıkalyq fızıka-matematıka mektebiniń Fizmat Primary mektebine alǵys aıtty.
Daryndylar alańyna shyǵarmashylyq baıqaýlarda oza shyǵyp, júldeli oryn ıelenip júrgen shákirtter jınaldy.
«Men aqyldy balaqaı» aýmaǵynda jelilik qaýymdastyqtar boıynsha mektepterdiń tájirıbelik alańdary kórsetildi. Kópshilik nazaryna usynylǵan «Laboratorııa», «Intellekt», «Oqýǵa qushtar mektep», «Jaıdarmanshylar», «Ekomektep», «Sýret álemi», «Sóz sheberleri» jobalarynyń oqýshylardyń tanymdyq qabiletin arttyrýda, olardyń qyzyǵýshylyǵyn oıatý, kásiptik baǵdar berýde mańyzdylyǵy joǵary ekenin atap ótý kerek.
«Patrıot» alańynda bolashaq el qorǵaýshy sarbazdar, kóshbasshylar, bolashaq chempıondar saptyq úlgilerdi kórsetti. Sonymen qatar qaladaǵy balalarǵa arnalǵan D.Nurpeıisova atyndaǵy mýzyka mektebiniń ansambli ónerin ortaǵa saldy.
«Bıle, bizben birge» alańyna qaladaǵy bilim berý uıymdarynyń bı ujymdarynan 600-den astam bıshi qatysyp, beıbitshilik pen tynyshtyq ornaǵan eldegi baqytty balalyq shaq kórinisin kórsetti.
«Qaısar! Jiger! Shabyt!» alańynda qosymsha bilim berý uıymdary balalar úshin oıyn-saýyq baǵdarlamasyn uıymdastyrdy. Merekelik festıval konserttik baǵdarlamamen jalǵasyn tapty.
Maýsymnyń 1-i kúni Batys Qazaqstan oblysynyń ákimi Ǵalı Esqalıev Oqýshylar saraıynda 2021-2022 oqý jylynda halyqaralyq, respýblıkalyq olımpıadalarda jeńimpaz bolǵan 60 oqýshymen kezdesip, syı-qurmet kórsetti.
Batys Qazaqstan oblysy