Qasym-Jomart Toqaev Qazaqstanǵa resmı saparmen kelgen Qytaı Halyq Respýblıkasy Memlekettik keńesiniń múshesi, Syrtqy ister mınıstri Van Idi qabyldady, dep habarlaıdy Egemen.kz Aqordanyń baspasóz qyzmetine silteme jasap.
Kezdesý barysynda Qazaqstan men Qytaı arasyndaǵy uzaqmerzimdi, jan-jaqty strategııalyq seriktestiktiń qazirgi ahýaly men perspektıvalary, sondaı-aq halyqaralyq jáne aımaqtyq uıymdar aıasyndaǵy yntymaqtastyq máseleleri talqylandy.
Memleket basshysy 30 jyl ishindegi strategııalyq seriktestiktiń deńgeıine joǵary baǵa berip, Qazaqstan men Qytaıdyń ózara ekijaqty keshendi baılanystaryn nyǵaıta berýge beıildi ekenin aıtty.
Memleket basshysy QHR Tóraǵasy Sı Szınpınniń aldaǵy kúzde elimizge josparlanǵan memlekettik sapary ekijaqty qatynastardy damytýǵa tyń serpin beredi dep úmittenetinin jetkizdi.
«Bıyl – óte mańyzdy jyl. Qazaqstan men Qytaı arasyndaǵy dıplomatııalyq qatynastardyń ornaǵanyna 30 jyl toldy. Qytaıda kommýnıstik partııanyń HH sezin ótkizý josparlanǵan. Aldaǵy joǵary deńgeıdegi kelissózder bizdiń strategııalyq seriktestigimizdiń jylnamasyna erekshe oqıǵa retinde jazylady», dedi Prezıdent.
Sonymen qatar kezdesýde Qasym-Jomart Toqaev qytaılyq áriptesine júrekjardy sálemin joldady jáne QHR-dyń tóraǵalyǵymen ótetin joǵary deńgeıdegi «BRIKS plıýs» onlaın-dıalogyna qatysýǵa shaqyrǵany úshin rızashylyǵyn bildirdi. Onlaın-dıalog jańa dáýirde damý úshin jahandyq seriktestik ornatý taqyrybyna arnalǵan.
Qasym-Jomart Toqaev QHR Tóraǵasynyń jahandyq qaýipsizdik jáne damý salasyndaǵy bastamasyna qoldaý bildiretinin aıtty. Onyń tolyqqandy júzege asyrylýy álemdik deńgeıdegi qaýipsizdik pen senimge jetpeı turǵan olqylyqtardyń ornyn toltyrýǵa múmkindik beredi, sondaı-aq BUU-nyń 2030 jylǵa deıingi ornyqty damý salasyndaǵy Maqsattaryn júzege asyrýǵa yqpal etedi.
Van I Qasym-Jomart Toqaevqa Sı Szınpınniń sálemi men elimizdegi jalpyulttyq referendýmnyń tabysty ótýine baılanysty quttyqtaýyn jetkizdi.
«Referendým nátıjeleri memleketti jan-jaqty jańǵyrtý úshin Sizdiń basshylyǵyńyzben qabyldanyp jatqan sharalardy el azamattarynyń barynsha qoldaıtynyn kórsetedi. Munyń jańa Qazaqstandy qurý úshin zor máni bar, sondaı-aq eldiń keleshek damýynyń berik negizin qalyptastyrady», dedi Qytaı Memlekettik keńesiniń múshesi.
Qytaı mınıstri eki el kóshbasshylarynyń dana basshylyǵynyń arqasynda QHR men Qazaqstannyń ekijaqty qarym-qatynastary úlken ómirlik kúshke ıe bolatynyn atap ótti.
«Tóraǵa Sı Szınpın Sizben aradaǵy jeke dostyqty jáne ózara senimdi joǵary baǵalaıdy. Jańa Qazaqstan qurý jónindegi bastamańyz Sizdiń danalyǵyńyz ben batyldyǵyńyzdy kórsetedi. Biz Sizdiń bastamalaryńyzdyń sátti júzege asyrylýyn tolyqqandy qoldaımyz», dedi Van I.
Kezdesý barysynda Qasym-Jomart Toqaev pen Van I aımaqtyq jáne jahandyq kún tártibiniń ózekti máseleleri jóninde pikir almasty. Olar halyqaralyq arenadaǵy, sonyń ishinde Birikken Ulttar Uıymy, Shanhaı yntymaqtastyq uıymy jáne Azııadaǵy ózara is-qımyl jáne senim sharalary jónindegi keńes, Islam yntymaqtastyǵy uıymy aıasyndaǵy yqpaldastyqty jalǵastyra berýge nıetti ekenin aıtty.