Qazaqstandyq tennısshi Aleksandr Nedovesov juptyq synda Shtýtgart ATP 250 týrnıriniń shırek fınalyna ótti, dep habarlaıdy Egemen.kz.
Aleksandr Nedovesov pákistandyq Aısam Kýreshımen birge bastapqy kezdesýin jarystyń ekinshi raketkalary, aýstralııalyq Djon Pırs pen slovakııalyq Fılıpp Polashekpen ótkizdi.
Qazaqstandyq-pákistandyq jup qarsylastaryn 7:6 (7:2), 6:4 esebimen utty. Olar 1 saǵat 20 mınýtqa sozylǵan match barysynda 9 eıs jasap, 5 breık-poınttyń bireýin paıdalandy.
D.Pırs 2017 jyly juptyq synda Aýstralııa ashyq chempıonatynyń jeńimpazy atansa, F.Polashek ótken jyly dál osy «Úlken dýlyǵa» jarysynda ozyp shyqqan edi.
Endi A.Nedovesov pen A.Kýreshı júlde qory 770 myń eýroǵa jýyqtaıtyn dodanyń jartylaı fınalyna shyǵý úshin kanadalyq Denıs Shapovalov pen úndistandyq Rohan Bopannamen kortqa shyǵady.