Vadım Pronskıı eki jyl qatarynan ıtalıandyq «Adrıatıka-Ionıka» atty kópkúndik jarysynda jeńiske jetti, dep habarlaıdy Egemen.kz.
Qazaqstandyq veloshabandoz alǵashynda Monte-Grappa shyńynda márege jetip, ekinshi oryn ıelengen. Al koroldik taý kezeńinde úshinshi orynǵa ıe boldy. Nátıjesinde jalpy esepte úshinshi orynǵa taban tirep, elimizge júldeli oraldy. Súıinshi jańalyqty Astana Qazaqstan Team velosport komandasynyń baspasóz qyzmeti jetkizdi.
Jarysta sońǵy úsh kezeńde Pronskıı jyldamdyqty arttyryp, klassıfıkasııadaǵy jaǵdaıdy ózgertýge tyrysty. Qarsylastaryn shań qaptyrýǵa baryn saldy. Jarystyń jeńimpazy Italııalyq veloshabandoz Fılıppo Zana atansa, ekinshi oryndy tanymal sportshy Natnael Tesfatsıon ıelendi.
«Shyny kerek, «Adrıatıka-Ionıkada» óner kórsetkenime rızamyn. Men Djırodan keıin kishkene álsirep qaldym, biraq kúnnen-kúnge jaqsaryp, koroldik etapta úshinshi orynǵa ıe boldym. Erekshe qıyn bolǵany - úshinshi kezeń. Jyldam, ári bıiktikke tik kóterilýge týra keldi. Taýdan túsý barysynda tehnıkalyq tabysqa jetýge barymdy saldym. Alaıda, máre syzyǵyna nebári 100 metr qalǵanda qarsylastarym qýyp jetti. Men úshin úlken jumys istegen komandaǵa alǵysymdy bildirgim keledi», dedi Vadım Pronskıı.
Astana Qazaqstan Team komandasy jarystyń sońǵy eki kezeńinde ózderin belsendi kórsetip, jeńis úshin kúresýge tyrysty. 7 maýsymda Antonıo Nıbalı márege altynshy bolyp keldi. Al 8 maýsymda Manýele Boaro tórtinshi bolyp márege jetken edi.
Asemaı Erlanqyzy