Magıstratýraǵa túsý úshin keshendi testileýge qatysýǵa ótinishter qabyldaý bastaldy. Tirkeý QR BǴM Ulttyq testileý ortalyǵynyń app.testcenter.kz saıtynda 2022 jylǵy 15 shildege deıin júrgiziledi, dep habarlaıdy Egemen.kz.
Bilim jáne ǵylym mınıstrliginiń málimetinshe, úmitkerler bilim berý baǵdarlamalary toby, úmitkerlerdiń testileýdi ótkizý tili men ornyna ótinimderdi qabyldaý merzimi aıaqtalǵanǵa deıin ózgerister engize alady. Testileý kúni týraly aqparat úmitkerdiń jeke kabınetinde qoljetimdi bolady. Al keshendi testileý 20 shildede bastalyp, 10 tamyzǵa deıin jalǵasady.
«Keshendi testileý elektrondy formatta ótkiziledi jáne úsh bólikten turady: shet tili, oqýǵa daıyndyqty anyqtaý jáne bilim berý baǵdarlamalary tobynyń beıini boıynsha test. Oǵan 4 saǵat beriledi. Shet tilin bilý deńgeıin rastaıtyn halyqaralyq sertıfıkattary bolsa, úmitkerler shet tilinen test tapsyrýdan bosatylady», dep túsindirdi QR BǴM Ulttyq testileý ortalyǵynyń dırektory Rýslan Emelbaev.
Talapkerlerge magıstratýraǵa túsý úshin bilim berý baǵyttarynyń sáıkestigin anyqtaý boıynsha nusqaýlyqtar engizildi. Bul bilim berý baǵdarlamalarynyń sabaqtastyǵyn, úzdiksizdigin saqtaý jáne bakalavrıat mamandaryn daıarlaý sapasyn arttyrý úshin qajet. Sondyqtan belgili bir bilim berý baǵdarlamasyna qujattardy tapsyrar aldynda talapkerler ýnıversıtettiń qabyldaý komıssııasymen keshendi testileýdiń formaty jáne tańdalǵan bilim berý baǵdarlamasy tobynyń talapker alǵan mamandyqqa sáıkestigi týraly keńesýi qajet. Keńesti ýnıversıtettiń vırtýaldy qabyldaý komıssııasynan da alýǵa bolady.
Bıyl ǵylymı-pedagogıkalyq magıstratýraǵa túsý úshin shekti ball – 75, mamandandyrylǵan magıstratýraǵa túsý úshin – 50 ball.
Keshendi testileý nátıjelerimen kelispegen jaǵdaıda, úmitkerler testileýden ótkennen keıin onlaın apellıasııaǵa bere alady.
2022-2023 oqý jylyna arnalǵan magıstratýraǵa memlekettik bilim berý tapsyrysy 13 myńnan astam grant ekenin eske sala keteıik.