Jańa oblys ortalyqtary óńirlerdi damytýǵa jańa serpin beredi. Bul týraly Ortalyq kommýnıkasııalar qyzmetinde QR Ulttyq ekonomıka mınıstri Álibek Qýantyrov málim etti, dep habarlaıdy Egemen.kz.
«Bıyl 16 naýryzda Memleket basshysy óziniń «Jańa Qazaqstan: jańarý men jańǵyrý joly» atty Qazaqstan halqyna Joldaýynda Abaı, Jetisý, Ulytaý oblystaryn qurýdy usyndy. Ákimshilik-aýmaqtyq qaıta qurý aýmaǵy 935 myń sharshy km (el aýmaǵynyń 35%) aýmaqta turatyn shamamen 5 mln turǵynnyń (4,9 mln adam, el halqynyń 25%) ómirine áser etetinin atap ótken jón. Onyń ishinde aýdany 493 myń sharshy km (el aýmaǵynyń 18%-y) bolatyn Abaı, Jetisý, Ulytaý jańa oblystarynda shamamen 1,5 mln adam (el halqynyń 7,8%) turady. Eldiń ákimshilik-aýmaqtyq qurylysyndaǵy osy ózgerister áleýmettik-ekonomıkalyq damýdaǵy teńgerimsizdikti tómendetý jáne óńirlerdiń aýmaqtyq baılanysyn qamtamasyz etý negizine baǵyttalǵan jańa óńirlik saıasattyń basymdyqtaryna tolyq sáıkes keledi», dedi Álibek Qýantyrov.
Onyń aıtýynsha, Semeı, Jezqazǵan jáne Qonaev qalalaryna oblys ortalyǵy mártebesin berý óńirlerdi damytýǵa jańa serpin beredi.
«Búginde bul qalalarda ınfraqurylymnyń tozýyna, joldardyń sapasyna, kólik júıesiniń jaı-kúıine baılanysty problemalar bar. Jańa mártebe osy qalalarǵa ınvestısııa aǵynyn ulǵaıtady jáne aýmaqtyq-ákimshilik bólinistiń neǵurlym utymdy esebinen jergilikti problemalardy neǵurlym tıimdi sheshýge múmkindik beredi. Jalpy, Memleket basshysynyń bul reformasy óńirlerde jınaqtalǵan problemalardy keshendi sheshýge jáne olardyń odan ári damýynyń kedergilerin joıýǵa baǵyttalǵan. Memleket basshysynyń jańa oblystardy qurý jónindegi bastamasy halyq, jurtshylyq, qaralyp otyrǵan óńirlerdiń aýdandyq jáne oblystyq deńgeıdegi depýtattary arasynda qoldaý tapty», dedi mınıstr.