Meksıkanyń Leon qalasynda aýyr atletıkadan jasóspirimder arasynda ótip jatqan álem chempıonatynda Qazaqstan qorjynyna ekinshi medal tústi, dep habarlaıdy Egemen.kz.
Qazaqstan aýyr atletıkasy federasııasynyń málimetinshe, Erasyl Omarov 55 kelige deıingi salmaqta úshinshi orynǵa ıe boldy.
Erasyl qossaıys qorytyndysynda 224 kılogramm (100+124) jınady. Bul salmaqta úndistandyq Gýrýnaıdý Sanapathı (104+126) álem chempıony atansa, Saýd Arabııasynyń ókili Kalıtıt Alı Madjıt (105+124) kúmis medaldi oljalady.
Eske sala keteıik, buǵan deıin aýyr atletıkadan álem chempıonatynda qazaqstandyq Aleksandra Belenko úzdik úshtikke ilingen edi.