Májiliste «Qazaqstan Respýblıkasynyń Ákimshilik quqyq buzýshylyq týraly kodeksine qarjylyq pıramıdalardyń qyzmetine qarsy is-qımyl máseleleri boıynsha tolyqtyrý engizý týraly» Qazaqstan Respýblıkasy zańynyń jobasy maquldandy, dep habarlaıdy Egemen.kz.
Májilis depýtaty Iýrıı Lıdiń aıtýynsha, qaraýǵa usynylyp otyrǵan zań jobalarynyń negizgi maqsaty – qarjy pıramıdalyq shemalardy jasaǵany úshin jaýapkershilikti kúsheıtý, sondaı-aq olardy jarnamalaǵany úshin qylmystyq jaýapkershilikti engizý arqyly azamattardyń quqyqtaryn qorǵaý tetikterin jetildirý.
«Jumys tobynyń otyrysynda zań jobasyn qaraý barysynda jekelegen normalardy jetildirý maqsatynda birqatar túzetý qabyldandy. Sonymen qatar jumys toby zań jobasyn quqyqtyq tehnıka normalaryna sáıkes keltirý maqsatynda engizilgen ózgerister men tolyqtyrýlardy qabyldady», dedi ol.
Sondaı-aq zań jobasy «terrorıstik áreket» uǵymyn keńeıtý maqsatynda «Terrorızmge qarsy is-qımyl týraly» Zańnyń erejesin Qylmystyq kodekstiń erejelerine sáıkes keltirýge baǵyttalǵan. Palatanyń jalpy otyrysynda «Ákimshilik quqyq buzýshylyq týraly kodekske qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» ilespe zań jobasy da ekinshi oqylymda maquldandy.
Qujattar endi Senattyń qaraýyna engiziledi.