Memleket basshysy Qasym-Jomart Toqaev birqatar eldiń elshilerinen senim gramotalaryn qabyldady, dep habarlaıdy Egemen.kz Aqordanyń resmı saıtyna silteme jasap.
Senim gramotalaryn Vetnam elshisi Thaı Nyy Maı Fam, Portýgalııa elshisi Marııa de Fatıma Velez de Andrade Mendesh, Armenııa elshisi Armen Gevondıan, Chılı elshisi Edýardo Eksobar Marın, Jańa Zelandııa elshisi Sara Marı Ýolsh tapsyrdy.
Memleket basshysy elshilerdi Qazaqstandaǵy dıplomatııalyq mıssııalarynyń resmı bastalýymen quttyqtap, elimizdegi ıgi mindetterin oryndaý barysynda olarǵa Prezıdent Ákimshiligi men Qazaqstan Úkimeti tarapy jan-jaqty qoldaý kórsetetinin jáne kómektesetinin aıtty.
Qazaqstan Prezıdenti Vetnammen aradaǵy tyǵyz yntymaqtastyqty damytý Azııa-Tynyq muhıty keńistigine, sonyń ishinde Ońtústik-Shyǵys Azııa elderiniń assosıasııasyna múshe memleketterge (ASEAN) qatysty Qazaqstannyń syrtqy saıasatynyń ajyramas bólshegi ekenin atap ótti.
«Qazaqstan Vetnammen aradaǵy saıası dıalogty jáne saýda-ınvestısııalyq baılanysty keńeıtýge múddeli. Vetnam Prezıdentiniń Qazaqstanǵa memlekettik sapary ekijaqty seriktestiktiń uzaqmerzimdi jan-jaqty jol kartasyn ázirleýge múmkindik beredi dep sanaımyn. Onyń sapary Azııadaǵy ózara is-qımyl jáne senim sharalary jónindegi keńestiń elordada ótetin aldaǵy sammıtimen tuspa-tus keledi dep úmittenemiz», dedi Memleket basshysy.
Qasym-Jomart Toqaev Portýgalııany Qazaqstannyń Eýropa odaǵyndaǵy senimdi seriktesi sanaıtynyn aıtty.
«Kólik jáne logıstıka, aýyl sharýashylyǵy, energetıka, jańartylatyn qýat kózderi, jańa tehnologııalar, mádenıet jáne týrızm salalaryndaǵy yqpaldastyqty nyǵaıtý úshin áleýet jetkilikti. Bul baǵyttaǵy yntymaqtastyqtyń damýy Portýgalııa Prezıdentiniń Qazaqstanǵa resmı saparyn uıymdastyrý úshin jaqsy negiz bolady», dedi Memleket basshysy.
Qazaqstan Prezıdenti elimizdiń TMD keńistigindegi negizgi seriktesteriniń biri – Armenııamen aradaǵy kópjyldyq yntymaqtastyqqa basa mán beretinin atap ótti.
«Bizdiń ekijaqty qarym-qatynasymyz tereń tarıhı baılanystarǵa negizdelgen. Ońtústik Kavkazdyń strategııalyq mańyzdy óńirinde beıbitshiliktiń turaqty bolýy jáne onyń órkendeýi bizdiń kópjosparly ekijaqty jáne kópjaqty seriktestigimizdi odan ári nyǵaıtatynyna senimdimin», dedi Prezıdent.
Memleket basshysy Chılımen aradaǵy ekijaqty yqpaldastyqtyń damýyna kóńili tolatynyn bildirip, ony jańa deńgeıge kóterý perspektıvalaryna nazar aýdardy.
«Biz Chılıdiń mys alpaýyty CODELCO korporasııasynyń qazaqstandyq kompanııalarmen strategııalyq seriktestik ornatýǵa degen ornyqty nıetin quptaımyz», dedi Prezıdent.
Qasym-Jomart Toqaev Jańa Zelandııamen aradaǵy ekijaqty qarym-qatynasqa nazar aýdara otyryp, onyń ózara senim men myzǵymas dostyqqa negizdelgenin atap ótti.
«Qazaqstan Jańa Zelandııa Úkimetimen yntymaqtastyq ornatýǵa, jalpy tasymal júıesi men ekonomıkalyq ornyqtylyqty nyǵaıtý úshin ózara saýda-sattyqty jáne ınvestısııany keńeıtýge múddeli», dedi Prezıdent.
Jıyn sońynda Memleket basshysy dıplomattarǵa tabys tilep, olardyń elderiniń kóshbasshylaryna júrekjardy sálemin joldady.