Bul týraly Qazaqstan Prezıdenti Qasym-Jomart Toqaev «Rossııa-24» telearnasynyń jýrnalısi Andreı Kondrashovqa bergen suhbatynda aıtty, dep habarlaıdy Egemen.kz.
Prezıdenttiń aıtýynsha, Qazaqstan ekonomıka salasyndaǵy favorıtızmnen alshaqtaýy tıis.
«Elde áleýmettik ádilettilik bolýy tıis. Árıne, men ýtopıst nemese qııalshyl emespin, bul bir kún, bir aı nemese bir jyldyq jumys emes ekenin túsinemin. Biraq buǵan umtylý kerek, sebebi halyq ádilettilikti qalaıdy», dedi Qasym-Jomart Toqaev.
Memleket basshysynyń aıtýynsha, onyń Prezıdent retindegi mindeti - Qazaqstan azamattary úshin ádilettilikti qamtamasyz etý.
«Áleýmettik ıerarhııada barlyǵy teń bolýy kerek. Qalaı bolǵanda da áleýmettik lıft jumys isteýi qajet. Biz memlekettik laýazymdarǵa, ulttyq, memlekettik kompanııalardaǵy belgili bir laýazymdarǵa óte qabiletti, patrıottyq rýhy bar adamdardy tańdaýymyz kerek. Bul depýtattardy saılaýǵa da qatysty», dedi Qazaqstan Prezıdenti.
Sondaı-aq ol Memleket basshysy retinde Parlament saılaýynyń nátıjesine tikeleı áser ete almaıtynyn aıtty.
«Meniń mindetim - qoǵamnan óz ornyn taba alatyn jáne bolashaqqa optımıstik kózqaraspen qaraıtyn saıası atmosferany qurý», dedi Qasym-Jomart Toqaev.