Áskerge shaqyrylǵandardyń anasy redaksııaǵa balasyn áskerı komıssarıatqa kúshtep, zańsyz alyp ketkenin jáne jibermeı jatqanyn aıtyp, shaǵymdandy, dep habarlaıdy Egemen.kz mangystaumedia.kz saıtyna silteme jasap.
Mańǵystaý oblysy Qorǵanys isteri jónindegi departamenti áskerge shaqyrý bóliminiń bastyǵy Talǵat Sarbasovtyń aıtýynsha, áskerge shaqyrýdy keıinge qaldyrý nemese odan bosatýǵa negizi joqtar ǵana alynady.
«Bıyl 1 naýryzdan bastap 30 maýsymǵa deıin Aqtaý qalasynda jergilikti polısııa qyzmetiniń qyzmetkerleri, Ulttyq ulanynyń áskerı qyzmetshileri jáne Aqtaý qalasynyń jergilikti áskerı basqarý organdarymen reıdtik is-sharalar júrgiziledi. Merzimdi áskerı qyzmetke shaqyrylǵandardy izdestirý jáne jetkizý, shaqyrý naýqany kezinde múmkin bolmaǵandarǵa shaqyrý qaǵazdaryn jetkizý jumystary júrgizilýde. Reıd barysynda áskerı esepke alýdy jáne áskerı mindetti belgileý maqsatynda ásker jasyndaǵy jigitterge saýalnama júrgizilip jatyr. Jeke kýálik pen jeke sáıkestendirý nómiri boıynsha tirkelgen málimetter tekseriledi. Áskerı qyzmet ótkerýdi keıinge qaldyrý nemese bosatý týraly málimetter belgilenbegen jaǵdaıda, azamat jergilikti áskerı basqarý organdarynyń shaqyrý ýchaskesine jetkiziledi. Jergilikti áskerı basqarma aýmaǵynda uıaly telefondardy paıdalanýǵa tyıym salynady», dedi Talǵat Sarbasov.