Memleket basshysynyń sheshimderi elimizdiń Táýelsizdigi men memlekettigin saqtap qaldy. Bul týraly Ulytaý oblysynda ótip jatqan Ulttyq quryltaıdyń otyrysynda Májilis tóraǵasy Erlan Qoshanov aıtty, dep habarlaıdy Egemen.kz.
«Búgingi Ulttyq quryltaıǵa biz ata-babalarymyzdyń artynda qaldyrǵan – tatýlyq pen birliktiń baıraǵyn kóterip, adal amanatyn arqalap kelip otyrmyz. Barsha kópultty otandastarymyzdyń osy ıgi jolda Memleket basshysy Qasym-Jomart Kemeluly Toqaevtyń «Babalar amanatyna adal bolyp, ony urpaqqa tabystaý – men úshin kıeli paryz» degen ardaqty sózinen qýat alǵany aqıqat! Oǵan osydan eki apta buryn Ata zańymyzǵa engizilgen ózgeristerge arnalyp ótken respýblıkalyq referendýmnyń oń nátıjeleri aıqyn dálel. Qazaq eli óz tarıhynyń jańa belesine aıaq basty», dedi E. Qoshanov.
Qoshanovtyń aıtýynsha, 5 maýsymda ótken referendým qazaq halqynyń aýyzbirshiligin, ulttyq baǵytta uıysa biletinin kórsetti.
«Halqymyz Memleket basshysy Qasym-Jomart Kemeluly Toqaevtyń Ekinshi respýblıka qurýdy kózdegen strategııalyq baǵytyn, tereń reformalaryn, eldi túbegeıli ózgertýge baǵyttalǵan tarıhı talpynysyn basym daýyspen qoldady. Elimiz reformalardyń odan ári jalǵasýyn, jalǵasa berýin qalap otyr. El-jurtty aralap, myńdaǵan kezdesýler ótkizgen kezde Májilis depýtattary, «Amanattyń» óńirdegi ókilderi osyǵan tolyq kóz jetkizdik. Túptep kelgende, Qasiretti qańtar oqıǵasynan keıin Qazaqstannyń bolashaǵyna, qazaq qoǵamynyń birligine kúmán keltirgender de az bolǵan joq. Alaıda tarıhı referendým halqymyzdyń tutastyq pen aýyzbirshilikke, memleketshildik muraty men táý etken Táýelsizdikke adal ekenin aıqyn kórsetti.
«Osy tusta bir nárseni erekshe atap ótkim keledi. El taǵdyry qyl ústinde turǵan sol syn saǵattarynda asa aýyr jaǵdaıda qandaı qıyn sheshimder qabyldaǵanyńyzdyń kýágeri boldyq. Ol týraly keshegi bergen tele-suhbatyńyzda ózińiz de aıttyńyz. Sol sheshimder bizdiń táýelsizdigimiz ben memlekettigimizdi saqtap qalǵany – aqıqat», dedi Erlan Qoshanov.
Aıta keteıik, búgin QR Prezıdenti Qasym-Jomart Toqaevtyń qatysýymen Ulytaýda Ulttyq quryltaıdyń alǵashqy otyrysy ótip jatyr.