Koronavırýs ınfeksııasynyń beti qaıtqanymen otandyq medısına salasynyń ıyǵynan aýyr júk túsken joq. О́ıtkeni densaýlyq kúzetindegi mindet árdaıym jaýapkershilik júkteıdi. Osy sapta jetisýlyq dárigerler de bar.
Memleket adamdardyń densaýlyǵyna únemi alańdaýshylyq tanytyp, medısınalyq kómektiń qoljetimdi bolýyn basty orynǵa qoıyp keledi. Onyń bir kórinisin óńirdegi medısına nysandaryn jańǵyrtý men jańadan salý isinen kórýge bolady. Mysalǵa, Jetisý oblysynda respýblıkalyq bıýdjet esebinen Kerbulaq aýdany Saryózek aýylynda 250 oryndy emhananyń qurylysy júrgizilýde. Jalpy, bıyl densaýlyq saqtaýdyń 7 nysany salyna bastady. Sonyń beseýi osy jyly iske qosylýǵa tıis, 2 nysannyń qurylysy kelesi jyly jalǵasady. Sol sııaqty Qaratal aýdandyq ortalyq aýrýhananyń «B» blogynyń kúrdeli jóndeýin aıaqtaýǵa jáne aýrýhana aýmaǵyn abattandyrýǵa, sondaı-aq Sarqan aýdany Cherkassk aýylyndaǵy dárigerlik ambýlatorııanyń kúrdeli jóndeýin bastaýǵa qarjy bólindi. Al búginde Jetisý oblysynda 29 aýrýhana, 278 ambýlatorııalyq emhana jumys istep tur eken.
Aımaqta aq jeleńdi abzal jandardyń eńbegine degen qurmet te erekshe. Kúni keshe «2022 jyldyń úzdik medısınalyq qyzmetkeri» baıqaýynyń jeńimpazdary marapattaldy. Oblys kóleminde ótkizilgen baıqaýda «Emhananyń úzdik dárigeri» atanǵan Eskeldi ortalyq aýdandyq aýrýhanasynyń dárigeri Bıjamal Kúlbekovaǵa Jetisý oblysynyń ákimi Beıbit Isabaev 7 mln teńgeniń sertıfıkaty men arnaıy dıplom tapsyrdy.
– Álemdi jaılaǵan koronavırýs indetimen kúreste dárigerler ýaqytpen sanaspaı, erekshe qajyr-qaırat tanytty. Syn saǵatta memleket barlyq qajetti sharalardy qabyldady. Osyndaı ortaq kúsh jumyldyrýdyń nátıjesinde indettiń beti qaıtty. Degenmen bul salada atqarylatyn sharýa áli de kóp. Solardyń qatarynda ana men bala ómirin qorǵaý, mamandardyń biliktiligin arttyrý, materıaldyq-tehnıkalyq bazany nyǵaıtý, ozyq tehnologııalar engizý sııaqty kóptegen másele tur, – dedi Jetisý oblysynyń ákimi Beıbit Isabaev óńir medısınasyn damytýdaǵy alda turǵan mindetterge qysqasha toqtala kele.
Sondaı-aq oblys ákimi medısına qyzmetkerleriniń kásibı merekesine oraı birqatar aq jeleńdi abzal jandy quttyqtap, marapattady. Olardyń qatarynda oblystyń medısına qyzmetkerleri arasynda ótkizilgen «2022 jyldyń úzdik medısınalyq qyzmetkeri» baıqaýynda «Densaýlyq saqtaý salasynyń úzdik menedjeri» atalymy boıynsha ozyp shyqqan oblystyq kardıologııalyq ortalyq dırektorynyń orynbasary Asqar Shormaqov, «Úzdik farmasevt» atanǵan oblystyq kópsalaly aýrýhananyń farmasevti Mahabbat Bodaýova, «Úzdik meıirbıke» ataǵyn ıelengen Panfılov aýdanaralyq kópsalaly aýrýhanasynyń meıirbıkesi Aıjan Aımaqova, «Úzdik feldsher» bolyp tanylǵan Alakól ortalyq aýdandyq aýrýhanasynyń feldsheri Nurlan Ýalıev sııaqty medısına qyzmetkerleri bar. Al oblystyq juqpaly aýrýhanalar aýrýhanasy «Úzdik medısınalyq mekeme» atandy. Jeńmpazdarǵa 1,5 mln teńgeden bastap, 7 mln teńgege deıin aqshalaı syılyqtar berildi. Munan bólek birqatar dáriger Jetisý oblysy ákiminiń Qurmet gramotasymen, Alǵyshatymen jáne Densaýlyq saqtaý mınıstrliginiń «Eńbek ardageri» medalimen jáne «Densaýlyq saqtaý isiniń úzdigi» tósbelgisimen marapattaldy.
Jetisý oblysy