Shymkent qalasynda oblystyq klınıkalyq aýrýhana aýlasynda kómir qyshqyl gazy saqtalǵan ballon jaryldy, dep habarlaıdy Egemen.kz qalalyq Tótenshe jaǵdaılar departamentine silteme jasap.
«Shymkent qalasy TJ departamentiniń «101» basqarý pýltine 2022 jylǵy 17 maýsymda saǵat 13:04-te qatty tarsyl estilgeni týraly habarlama kelip tústi. Keıin belgili bolǵandaı, Ál-Farabı aýdany Maıly Qoja kóshesi boıynda ornalasqan oblystyq klınıkalyq aýrýhananyń aýlasynda ashyq jerde kólemi 20 sh.m. quraıtyn bastyrmanyń astynda 1 dana kómir qyshqyl gaz saqtalǵan ballon jarylǵan. О́rt shyqqan joq. Joǵary rang boıynsha shaqyrylym rastalmady», dep jazylǵan Shymkent qalasy TJD qoǵammen baılanys toby taratqan aqparatta.
Oqıǵa ornyna Shymkent qalasy TJD О́rt sóndirý qyzmetinen 21 adam jáne 5 tehnıka jumyldyrylǵan.