Memleket basshysy «In Conversation with President Tokayev» atty arnaıy paneldik sessııaǵa qatysty. Jıynǵa «Bloomberg Television» júrgizýshisi Manýs Krennı moderatorlyq jasady, dep habarlaıdy Egemen.kz Prezıdenttiń baspasóz qyzmetine silteme jasap.
Suraq-jaýap formatynda ótken ashyq talqylaý barysynda Qazaqstan Prezıdenti halyqaralyq saıasattaǵy syn-qaterler boıynsha, ásirese Eýropada bolyp jatqan geosaıası teketirester aıasynda Reseı-Ýkraına qaqtyǵystary tóńiregindegi oqıǵalarǵa qatysty birqatar suraqqa jaýap berdi.
Reseı-Ýkraına qaqtyǵysyn beıbit jolmen sheshý joldaryna qatysty suraqqa jaýap bergen Qazaqstan Prezıdenti kelissózderdi jalǵastyra berýdiń mańyzdy ekenin atap ótti. Qasym-Jomart Toqaevtyń pikirinshe, bul qaqtyǵysty sheshýge taraptardyń erik-jigeri qajet. Sonymen qatar Memleket basshysy halyqaralyq qaýymdastyqtaǵy pikir qaıshylyǵy men atalǵan máseleni sheshýde BUU Qaýipsizdik Keńesiniń qaýqarsyzdyq tanytyp otyrǵanyna toqtaldy.
«BUU eshqashan mundaı yńǵaısyz jaǵdaıǵa tap bolǵan emes. Tipti «Qyrǵı-qabaq soǵys» kezinde de Birikken Ulttar Uıymynyń birligi budan áldeqaıda myǵym edi. Men BUU-nyń bolashaǵyna qatty alańdaımyn. Osy rette, kópqyrly saıasatqa senemin. Bul rette men halyqaralyq qaýymdastyqtyń birlik tanytyp, yntymaqtasa otyryp, eki memlekettiń beıbit bitimge kelýi úshin oń yqpal etýi kerek dep sanaımyn», dedi Memleket basshysy.
Prezıdent Reseıge salynǵan aýyr sanksııalyq saıasat saldarynan Qazaqstan qandaı ekonomıkalyq zardap shegýi múmkin degen moderatordyń suraqtaryna jaýap berdi.
Ashyq áńgime barysynda álemdik energetıka naryǵynda qalyptasqan qazirgi jaǵdaıǵa, halyqaralyq saýda máselesine baılanysty ǵalamdyq syn-qaterler de talqylandy.
Aıana Toǵanbek