Ońtústik astanada osydan úsh jyl buryn ashylǵan «Baqytty otbasy» ortalyqtarynyń sany búginde toǵyzǵa jetti. Áleýmettik máselelerdiń der kezinde sheshilip, azaıǵany qoǵamdaǵy basty máselelerdiń biri deıtin bolsaq, kómekke muqtaj azamattarǵa qoldaý kórsetý maqsatynda ortalyq mamandary tarapynan iske asyp jatqan jobalar qýantady.
Búginde Almatyda 32 myńnan astam kópbalaly otbasy turatyn bolsa, onyń 5 myńnan astamy «Altyn alqa» jáne «Kúmis alqa» ıegerleri. «Baqytty otbasy» ortalyǵynyń jetekshisi Zýlfııa Baısaqovanyń aıtýynsha, qala turǵyndarynyń bir bóligi ortalyqtar keńesine júginý nátıjesinde jumyspen qamtylyp, medısınalyq kómek alý úshin ońaltý mekemelerine jiberilgen. Al myńnan astamyna demeýshiler tarapynan materıaldyq qoldaý kórsetildi.
«Kópbalaly otbasylarǵa qoldaý kórsetýdi maqsat etetin ortalyqta áleýmettik baǵdarlamalar týraly keńeıtilgen aqparattar berilip, jumysqa ornalasýyna qolaıly jaǵdaılar jasalǵan. Kópbalaly jáne az qamtylǵan otbasy músheleriniń damýy men tulǵalyq ósýi de ortalyq mamandarynyń otbasylyq qundylyqtardy dáripteý aıasynda únemi qaperde turatyn mańyzdy másele. Al dástúrli qolónerdi damytý ortalyǵynda myńdaǵan adam oqytý kýrstarynan ótip, názik jandylar tigin sheberhanalaryn, aspazdyq, baspahanalardy, sulýlyq stýdııalaryn ashyp, qaıtarymsyz granttar alǵan. Isker Ana baǵdarlamasy boıynsha analar men olardyń otbasylary beıindik kýrstardan ótip, bıznes negizderin meńgerip, óz isin ashýǵa múmkindik alýda», dep atap ótti ortalyq jetekshisi.
Bul ortalyqtarǵa kópbalaly analar ǵana emes, sonymen qatar dombyra oınaýdy, akterlik sheberlik, bı, qolónerdi úırengisi keletin balalardyń qatysýyna múmkindik bar. Sondaı-aq balalarǵa orys jáne aǵylshyn tilderi, vokal, horeografııa boıynsha kýrstar da qoljetimdi.
«Baqytty otbasy» ortalyqtarynyń mamandary halyqtyń áleýmettik osal toptaryna kómek kórsete otyryp, aǵylshyn tili, kompıýterlik saýattylyq, tigin isi, bıznes-josparlaý, kıim dızaıny, kásipkerlik, býhgalterııa, aspazdyq, kıiz basý, vızaj, shashtaraz qyzmetteri, SMM-marketıng, uıaly telefondardy jóndeý, kondıter, aspaz jáne basqa da kásipterdi ıgerýge qoldaý kórsetedi. Jyl basynan bergi aralyqta bul kýrstardy 1 600-den astam adam támamdaǵan.
ALMATY