Qaraǵandyda áıelder kúresinen Qazaqstan chempıonaty aıaqtaldy. Bir táýlik aralyǵynda respýblıkamyzdyń barlyq aımaǵynan jınalǵan balýandar 10 salmaq dárejesiniń júldelerin sarapqa saldy. Bul jarysta Almaty oblysynan kelgen qyzdar atoı salyp, jalpykomandalyq esepte kósh bastady. Olar 126 upaı jıdy. Ekinshi satyǵa jergilikti sportshylar (115 upaı) jaıǵassa, Aqmola men Shymkenttiń ókilderi (95 upaı) úshinshi jáne tórtinshi oryndardy ózara bólisti.
Áıelder kúresinen jarys aınalmaly júıe boıynsha ótti. Jalpy esepte ozǵan Almaty oblysynyń balýandary arasynda alǵashqy altyndy asa jeńil salmaqtaǵy Aıgúl Nurálim jeńip aldy. 55 kılo salmaqta jastar arasyndaǵy álem birinshiliginiń (U-23) eki dúrkin qola júldegeri Marına Sednevanyń baǵy jandy. 62 kılo salmaq dárejesinde Aıaýlym Qasymova qarsylas shaq keltirmedi. Azııa chempıonatynda eki ret júldegerler qatarynan kóringen Aıaýlym sheshýshi tusta kúni keshe ǵana Bishkekte ótken 23 jasqa deıingi balýandar arasyndaǵy qurlyq birinshiliginde bas júldeni oljalaǵan aqmolalyq Irına Kýznesovany qapy qaldyrdy. Taǵy bir bas júldeni Gúlmaral Erkebaeva oljalady. Azııa chempıonatynyń tórt dúrkin qola júldegeri degen ataǵy bar balýan bul joly da aldyna jan salmady.
«Qaraǵandy-Arenaǵa» jınalǵan jurt 65 kılo salmaqtaǵy saıysty qyzyǵa tamashalady. Bul jerde negizgi básekelestik shymkenttik Elena Shalygına men shyǵysqazaqstandyq Irına Kazıýlına arasynda órbidi. 35 jastaǵy Shalygınanyń Beıjiń Olımpıadasynyń qola júldegeri, álem chempıonatynyń úsh dúrkin júldegeri, Azııa oıyndarynyń jeńimpazy, Azııanyń eki dúrkin chempıony sekildi tolyp jatqan ataq-dańqy bar. Osydan birer jyl buryn ol úlken sporttan qol úzgen. Bıyl boz kilemge qaıta oraldy. Jýyrda Elena Almatyda ótken Bolat Turlyhanovty eske alýǵa arnalǵan halyqaralyq týrnırde kúresti. Biraq qadamy sátsiz boldy. 27 jastaǵy Kazıýlına da qara jaıaý emes. Ol jastar arasynda Azııa chempıony atanyp, áıelderdiń qurlyq birinshiliginde úshinshi oryndy ıelengen. О́te shıelenisti ótken básekede talaı iri dúrmekterde ysylǵan Shalygınanyń asyǵy alshysynan tústi.
О́zge salmaq dárejelerinde aqmolalyq Ellada Mahıaddınova (53 kılo), Álbına Qaıyrgeldınova (68 kılo), Aleksandra Zaıseva (72 kılo) jáne nursultandyq Emma Tısına (57 kılo) men Dıana Qaıýmova (59 kılo) syndy burymdylar jeńis tuǵyrynyń eń bıik satysyna kóterildi. Taǵy bir aıta keterlik jaıt, áıelder kúresinen elimizdiń eń beldi balýandary – Jamılıa men Madına Baqbergenovalar bul jarystan bosatyldy.