Maýsym aıynyń 22-si kúni Shalqar kólinde úrlemeli tósekpen sýǵa túsip júrgen 9 jasar balany tolqyn jaǵadan alys aıdap áketken. Qutqarýshylar 5 qaıyqpen, súńgýir toptarymen jabyla izdedi, kelesi kúni izdeý jumysyna tikushaq qosyldy. Alaıda úsh kúnnen soń baıǵus balanyń óli denesi tabyldy...
«Ot pen sý – tilsiz jaý», dep eskertedi Batys Qazaqstan oblystyq tótenshe jaǵdaı departamenti. Jyl basynan beri oblys aýmaǵynda 5 adam sýǵa ketipti. Byltyr osy ýaqyt ishinde sýǵa ketken adam sany 12 bolǵan eken. Kórsetkish azaıǵanymen, ózen-kóldegi oqys oqıǵalardyń aldyn alý múmkin bolmaı tur. «Shyǵasyǵa ıesi basshy» degendeı, kóp jaǵdaıda adamdardyń beıqamdyǵy, qarapaıym saqtyq erejelerin saqtamaýy orny tolmas ókinishke soqtyrýda.
Batys Qazaqstan oblysynyń aýmaǵynda 200-ge jýyq ózen, 144 kól bar, jazdyń ystyq kúnderi halyq demalý jáne qydyrý úshin sý jaǵalap ketedi. Al búkil oblysta arnaıy jabdyqtalǵan 19 ǵana jaǵajaı bar eken. Bul jerlerde tótenshe jaǵdaı departamentiniń qutqarýshy jasaqtary – 46 adam qaýipsizdikti qadaǵalaıdy. Odan bólek, halyq kóp jınalatyn jaǵajaılarda polısııa, kóliktik baqylaý ınspeksııasy, jergilikti atqarýshy organ ókilderi jáne eriktiler birlesip, kún saıyn reıdtik is-sharalar ótkizedi. Biraq sýǵa shomylatyn ár adamǵa baqylaý ornatý múmkin emes.
– 2021 jylmen salystyrǵanda bıyl arnaıy jabdyqtalǵan jaǵajaı sany kóbeıdi. Qazir oblys aýmaǵynda 3 kommýnaldyq, 16 jeke jaǵajaı halyqqa qyzmet kórsetýde. Atap aıtsaq, bıyl Oral qalasynda, Bórli men Jánibek aýdandarynda bir-birden kommýnaldyq jaǵajaı jańadan ashylsa, Báıterek aýdanynda – 8, Oral qalasynda – 7, Tasqala aýdanynda 1 jekemenshik jaǵajaı ashylǵan, – deıdi Batys Qazaqstan oblystyq Tótenshe jaǵdaılar departamenti baspasóz qyzmetiniń jetekshisi Bákızat Maǵzenova.
Shomylý kezeńinde tótenshe jaǵdaılarǵa den qoıý úshin oblysta 72 qutqarýshy, 21 júzý quraly, 1 kater jáne patrýldeý úshin 15 avtomobıl daıyndalǵan.
Qazir jaz kezi, barlyq jerde oqýshylardyń jazǵy demalys lagerleri ótip jatyr. Osy kezeńde oblys boıynsha 29 modýldik-qańqaly basseın ashylǵan. Olardyń kóbi balalar lagerlerinde jáne aýdan ortalyqtarynda ornatylǵan.
Búginde tótenshelikter sýda bolatyn oqys oqıǵalardan saqtandyrý úshin oqýshylar arasynda profılaktıkalyq is-sharalardy júıeli uıymdastyryp otyr. Oblystyq dene shynyqtyrý jáne sport basqarmasymen aradaǵy memorandýmǵa sáıkes jyl basynan beri 673 bala júzýge úırengen. Al 1-28 maýsym aralyǵynda departament ókilderi 122 reıdtik is-shara ótkizip, halyqqa 2 200 jadynama taratqan.
Batys Qazaqstan oblysy