Mıllıarder Ilon Mask Twitter áleýmettik jelisin satyp alý kelisiminen bas tartqanyn málimdedi, dep habarlaıdy Egemen.kz VVS jańalyqtaryna silteme jasap.
Mámile 44 mıllıard dollarǵa baǵalanǵan. Endi kompanııa kelisimdi oryndatý maqsatynda Maskty sotqa bermek. Mask advokattarynyń sotqa bergen materıaldarynda kompanııanyń oǵan platformadaǵy jalǵan akkaýnttar týraly tolyq málimet berilmegeni jazylǵan.
Mask osy jyldyń sáýir aıynda jarııalanǵan mámileden bas tartady degen habardan keıin Twitter aksııalarynyń quny 6%-ǵa tómendedi. Kompanııanyń dırektorlar keńesiniń tóraǵasy Bret Teılor kompanııanyń qosylý kelisimin oryndaý úshin zańdy shara qoldanýdy josparlap otyrǵanyn aıtyp jaýap berdi.
Mask qorǵaýshylarynyń ótinishinde Twitter-diń platformadaǵy jalǵan nemese spam tirkelgileri týraly aqparat alý týraly birneshe suraýlarǵa jaýap bermegeni nemese jaýap berýden bas tartqany jazyldy. Buǵan deıin Mask eger áleýmettik jeli basshylyǵy oǵan jalǵan jáne spam akkaýnttary Twitter qoldanýshylarynyń 5%-dan aspaıtynyn dáleldemese, mámileden bas tartatynyn aıtqan.
Maýsym aıynda retteýshi organdarǵa joldaǵan resmı hatynda Mask kompanııanyń satyp alýshysy retinde Twitter-degi spam akkaýnttar sanyn derbes baǵalaýǵa quqyǵy bar ekenin jazdy. Mask tarapy Twitter osylaısha satý kelisiminiń sharttaryn buzdy dep málimdeıdi.