Otanymyz túgili ozyq elderdiń ózin omaqasa qulatqan indet irgemizden ketti degende bórkimizdi aspanǵa atyp qýanǵanymyz ras. Saý adamdy sarsańǵa salǵan sol bir sátterde dertke shaldyqpaýdyń jolyn izdep, densaýlyǵymyzdy oılap degbirimiz qashqany da shyndyq. Biraq koronavırýstan túbegeıli qutyldyq eken dep arqany keńge salýǵa áli erte. Saqtyq sharalaryn umytýǵa bolmaıdy. Sebebi eldegi epıdemııalyq jaǵdaı kúrdelenip, syrqattanǵandar sany ósip jatyr.
Mamandardyń aıtýynsha, maýsym aıynda mamyrmen salystyrǵanda aýrý deńgeıi 6,3 ese – 94-ten 595 jaǵdaıǵa deıin ósken. Máselen, syrqattanýshylyqtyń ósýi maýsym aıynyń ortasynan bastap baıqalady jáne qazirgi ýaqytta ortasha táýliktik sany táýligine 130 jaǵdaıdy quraıdy. Shildeniń alǵashqy 6 kúninde 773 jaǵdaı tirkelgen, bul maýsym aıyndaǵy syrqattanýshylyq deńgeıinen 1,3 ese joǵary. Epıdemııalyq jaǵdaıdy baǵalaý matrısasyna sáıkes bıyl 4 shildeden bastap Almaty qalasy «sary aımaqta» ornalasqan.
Densaýlyq saqtaý mınıstrliginiń 11 shildedegi málimetterine súıensek, Qazaqstanda 2 837 adam koronavırýs ınfeksııasynan emdelip jatyr. Onyń ishinde 291 pasıent stasıonarda, 2 546 naýqas ambýlatorııalyq deńgeıde em qabyldaýda.
«Keıingi táýlikte el aýmaǵynda 454 turǵynnan PTR testi arqyly KVI anyqtalǵan. Koronavırýsqa shaldyqqandardyń arasynda 14 adamnyń jaǵdaıy aýyr. Onyń ishinde Nur-Sultan qalasynda – 118, Almaty qalasynda – 200, Shymkent qalasynda – 23, Aqmola oblysynda – 7, Almaty oblysynda – 30, Atyraý oblysynda – 16, Shyǵys Qazaqstan oblysynda – 3, Jambyl oblysynda – 17, Batys Qazaqstan oblysynda – 1, Qaraǵandy oblysynda – 11, Qostanaı oblysynda – 3, Qyzylorda oblysynda – 12, Mańǵystaý oblysynda – 2, Pavlodar oblysynda – 5, Soltústik Qazaqstan oblysynda – 3, Túrkistan oblysynda – 3. Munymen osy ýaqytqa deıin elimizde koronavırýs ınfeksııasyn juqtyrǵandar sany 1 309 888 adamǵa jetti», dep jazdy vedomstvo.
Jaqynda Almatyda Premer-Mınıstrdiń orynbasary Eraly Toǵjanovtyń tóraǵalyǵymen koronavırýs ınfeksııasynyń taralýynyń aldyn alý jónindegi respýblıkalyq shtabtyń otyrysy ótti. Jıynda epıdemııalyq ahýal, KVI taralýynyń ósý sebepteri, tıisti halyqqa vaksınalaý jáne revaksınalaý júrgizý máseleleri qaraldy. Osy jyldyń maýsym aıynda syrqattanǵan adamdardyń vaksınalaý mártebesin taldaý kezinde 96%-y vaksına almaǵany jáne vaksınadan, revaksınadan keıin 6 aıdan asa ýaqyt ótken adamdar ekeni anyqtalǵan. Otyrys barysynda aıtylǵandaı, Almatyda syrqattanýshylyqtyń ósý sebepteri vaksınalaý jáne revaksınalaý qarqynynyń tómendeýimen qatar Omıkron Stels vırýsynyń bir túriniń taralýy boldy. Osyǵan baılanysty respýblıkalyq shtab koronavırýs ınfeksııasy boıynsha epıdemııalyq jaǵdaıdy turaqtandyrý maqsatynda Almaty qalasynyń ákimdigine tıisti halyqty vaksınalaýmen, revaksınalaýmen jáne qaıta revaksınalaýmen qamtýdy ulǵaıtý, medısınalyq-sanıtarııalyq alǵashqy kómektiń, mobıldi brıgadalardyń jáne daıarlanǵan kadrlar rezerviniń ázirligin qamtamasyz etý usynyldy.
Sonymen qatar elimizde sońǵy táýlikte 126 adam koronavırýs ınfeksııasynan jazylyp shyqqanyn aıta ketsek deımiz. COVID-19 taralýyna jol bermeý jónindegi vedomstvoaralyq komıssııa saýyǵyp, qatarǵa qosylǵandardyń turatyn aımaqtaryn da atap ótti. Bular Nur-Sultan qalasynda – 40, Almaty qalasynda – 74, Atyraý oblysynda – 9, Pavlodar oblysynda – 2, Túrkistan oblysynda – 1. Respýblıka boıynsha barlyǵy 1 293 448 adam COVID-19-dan emdeldi. Al koronavırýs ınfeksııasyna qarsy vaksınanyń birinshi komponentin – 9 532 368 adam, ekinshi komponentin – 9 315 917 adam saldyrdy.
Nur-Sultan qalalyq sanıtarlyq-epıdemıologııalyq baqylaý departamentiniń basshysy Sarhat Beısenova jýrnalısterge bergen suhbatynda elordaǵa kirip-shyǵýǵa tyıym engizý qarastyrylyp otyrmaǵanyn aıtty.
«О́tken aptada Qazaqstan aýmaǵynda koronavırýs ınfeksııasynyń taralýyna jol bermeý jónindegi vedomstvoaralyq komıssııa elimizdegi COVID-19-ben naýqastaný ósimin eskere otyryp, qandaı da bir óńir epıdemııalyq táýekeldiń «sary aımaǵyna» ótken jaǵdaıda engiziletin qosymsha is-sharalar týraly sheshim qabyldady. Onyń ishinde naýqaspen tyǵyz qarym-qatynasta bolǵandardy qashyqtan jumys isteý formatyna kóshirý, COVID-19-ǵa qarsy ekpe saldyrýǵa bolmaıtyn qyzmetkerler men júkti áıelderdi qashyqtan jumys isteý formatyna aýystyrý sharalary bar», dedi S.Beısenova.
Onyń atap ótýinshe, Ashyq qosymshasyn qaıtadan iske qosý, Nur-Sultan qalasyna kirýge jáne shyǵýǵa tyıym salý kózdelip otyrǵan joq. Degenmen qala turǵyndaryna adamdar jappaı jınalatyn jerge barǵanda, qoǵamdyq kólikke otyrǵanda maska taǵý usynylady.
«Ár adam, ásirese sozylmaly aýrýlary bar jandar densaýlyǵyna tónetin táýekel men qaýipti túsinýge tıis. Olardan adamdar kóp jınalatyn jerge barǵanda maska taǵyp, barlyq qaýipsizdik is-sharalaryn saqtaýǵa keńes beremiz. Ekpe nemese qaıtadan vaksına almaǵan turǵyndarǵa ujymdyq ımmýnıtetti kóterý úshin der ýaqytynda vaksına alý mańyzdylyǵyn jáne qajettiligin eske salamyn», dedi departament basshysy.
Sonymen qatar ol koronavırýs birshama tómen agressıvti formada ótetinin jetkizdi.
«Osy jyldyń maýsym aıynyń sońynan beri elordadaǵy koronavırýs ınfeksııasyna qatysty epıdemııalyq jaǵdaıdyń kúrdelenip kele jatqany baıqalady. Aıtalyq, osydan bir aı buryn táýlik ishinde birneshe ǵana jaǵdaı tirkelse, sońǵy eki aptada ortasha táýliktik tirkelim 120 jaǵdaıǵa jetip otyr. Sońǵy táýlikte koronavırýs ınfeksııasynyń zerthanalarda dáleldengen 118 jaǵdaıy tirkeldi. Koronavırýs ınfeksııasynyń damý qarqyny boıynsha repordýktıvtilik san 1,958-ge teń», dedi S.Beısenova.
Onyń aıtýynsha, aýrýshańdyqtyń artýyna qaramastan koronavırýs birshama tómen agressıvti formada ótip jatyr. Eń bastysy, naýqastardyń ishinde ókpeni jasandy jeldetý apparatyna qosylǵandar joq. Qazirgi ýaqytta 118 naýqas stasıonarlarda, onyń ishinde 11 naýqas reanımasııa bólimshesinde em alyp jatyr. Sonymen qatar 338 adam ambýlatorlyq jaǵdaıda em alý ústinde.