Aqtóbede ekologııa talaptaryn saqtamaı, qorshaǵan ortaǵa zııan keltirgen óndiris oryndaryna mılılard teńge kóleminde aıyppul salyndy. Bul týraly oblystyń bas ekologi habarlady, dep jazady Egemen.kz.
Aqtóbe oblystyq ekologııa departamenti qalany sý jáne jylýmen qamtamasyz etip otyrǵan «Aqtobe su-energy group» AQ-yn tekserdi.
Tekseris qorytyndylary káriz tazartý qurylǵysy jáne káriz sorǵylaý stansasy 1, 11 jáne 13 aımaǵynda qaldyqtardy ýaqytsha jınaý jáne saqtaýǵa arnalǵan arnaıy orynnyń joq ekenin kórsetti. Nátıjesinde sarqyndy sýlardy óńdeý kezinde shyqqan shlam qurylys, tamaq qaldyqtarymen jáne qatty turtystyq qaldyqpen aralasatyny belgili boldy. Laı tunbasy kádege jaratylmaǵan jáne qaıta óńdelmegen bolyp shyqty. Sonymen birge qaldyqtar órtelgen.
«Sýdy synaý hattamasyna sáıkes №1 sý retteýshi torapqa shyǵarylatyn sý quramynda lastaýshy zat mólsheriniń asyp ketkeni anyqtaldy. Bul jaıynda departamentke málimet tolyq usynylmaǵan. Tekserý nátıjeleri boıynsha kásiporynǵa qatysty Ákimshilik quqyq buzýshylyq týraly 18 hattama toltyryldy», dep túsindirdi oblystyq ekologııa departamentiniń basshysy Talap Usnadın.
Sondaı-aq Aqtóbe oblysy ekologııa departamenti oblys prokýratýrasymen birlesip «GasProcessingCompany» JShS tekserý jumystaryn júrgizdi.
«Aýaǵa lastaýshy zattardyń shyǵarǵan, jerdiń lastap, qaldyqtardy durys saqtamaǵan. Tekserý nátıjeleri boıynsha «GasProcessingCompany» JShS-i QR ÁQBtK-niń birneshe baby boıynsha ákimshilik is qozǵalyp, 675 mln teńgeden astam somaǵa aıyppul salyndy. Ákimshilik aıyppul somasy memleket kirisine erikti túrde óndirip alyndy», dep qosty Talap Usnadın.