Djokovıch Nadaldan oza ala ma?

Osylaısha, ol Rafael Nadaldyń rekordyna bir taban jaqyndaı tústi. Endi Djokovıch taǵy bir dúbirli dodada dara shyqsa, onda dańqty Ispanııa tennısshisimen teńesedi.

35 jastaǵy Novak Djokovıch­tiń sporttyń bul túrinde baǵyn­dyrmaǵan belesi joq. Ol Aýs­tralııanyń ashyq birinshili­ginde toǵyz márte top jardy. Ýımb­l­donda jeti ret jeńimpaz atandy. AQSh-tyń ashyq birinshiliginde úsh márte bas júldeni oljalady. Rolan Garrosta eki ret dara shyqty. ATR Masters 1000 týrnırinde 38 márte jáne ATR-diń álemdik týrynyń fınalynda bes ret teńdessiz dep tanyldy. Bul – rekordtyq kórsetkish! Sonymen qosa ol uzaq jyldar boıy álemdik reıtıngte jeke-dara kósh bastady. Bul kúnderi Djokovıch úzdikter tiziminde jetinshi oryndy ıelenýde. Mine, osylaı tizbekteı bersek, Serbııanyń sańlaǵyna kóptegen keremet kórsetkish tıesili ekenin ańǵarýǵa bolady.

Novak «Úlken dýlyǵa» týrnır­leriniń bas júldesine alǵash ret 2008 jyly qol jetkizdi. Sol ja­rys­tyń aqtyq synynda 21 jas­taǵy saıypqyran Fransııanyń ókili Jo-Vılfrıd Tsongany utty. Sodan keıin úsh jyl boıy baǵy janbady. Esesine 2011 jyly Melbýrn, London jáne Nıý-Iorkte uıymdastyrylǵan dúbirli dodalarda dara shyqty. Tek Parıjdegi jarysta ǵana onyń joly bolmaı, jartylaı fınalda súrindi. Dál sol nátıjesin ol araǵa 10 jyl salyp, 2021 jy­ly qaıtalady. Byltyr jasyl qur­lyqta ótken Aýstralııanyń ashyq birin­shiliginde ǵana onyń joly bol­mady. Fınalda Djokovıch reseı­lik Danııl Medvedevke jol berdi.

Bıylǵy maýsym Novak Djokovıch úshin asa sátti boldy dep aıta almaımyz. Sebebi ol koronavırýsqa qarsy ekpe sal­dyrýdan bas tartqany úshin jyldyń basynda Aýstralııanyń ashyq birinshiliginen shettetildi. Rolan Garrosta shırek fınalda súrindi. Taǵy bir-eki jarysta sátsiz óner kórsetti. Maıamıdegi Masterste baq synaýdan bas tartty. Sonyń saldarynan álemniń birinshi raketkasy degen ataǵynan aıyryldy.

Serbııanyń sportshysy kúni keshe ǵana aıaqtalǵan Ýımbldonnyń alǵashqy aınalymdarynda ońtústikkoreıalyq Kvon Son Ý, aýstralııalyq Tanası Kokkınakıs jáne óziniń otandasy Mıomır Kesmanovıchti qapy qaldyrdy. Bul kezdesýlerde jeńiske jetý úshin oǵan  úsh set jetkilikti boldy. Tórtinshi kezeńde nıderlandtyq Tım van Reıthovendi jolynan yǵys­tyrdy. Shırek fınalda ıtalııa­lyq Iаnık Sınnermer biraz tiresti. Alǵashqy eki sette Sın­ner basym túskenimen, odan keıin qar­qynyn kúrt kúsheıtken Djokovıch jeńisti qarsylasynyń ýysynan julyp áketti. Jartylaı fınalda jergilikti oıynshy Kemeron Norrıdi utsa, fınalda Aýstralııanyń atyshýly tennısshisi Nık Kırostan aılasyn asyrdy.

Búgingi tańda «Úlken dýlyǵa» sanatyndaǵy týrnırlerde jeńip alǵan bas júldelerdiń sany jaǵynan Novaktan bir ǵana tennısshi ozyp tur. Ol – Rafael Nadal. Ispanııanyń maqtanyshy Djokovıchten bir jas úlken. 1986 jyldyń 3 mamyrynda Malorka aralynda dúnıege kelgen saqa sportshy 22 ret eń mártebeli jarystardyń jeńimpazy atandy. Onyń 14-i – Rolan Garrostaǵy jeńis. Topyraq tósenishinde óte jaqsy oınaıtyn Nadaldy jankúıerlerdiń «Grýnt koroli» dep ataýy beker emes. Qazirgi kezde Pıreneı túbeginiń túlegi ATR reıtınginde úshinshi satyǵa jaıǵasty. Úshinshi orynda – Rodjer Federer. 40 jastaǵy Shveısarııanyń dúldúli chempıondyq tájdi 20 márte oljalady. Bul kúnderi Rodjer úzdikter tiziminde joq. Sońǵy ret ol 2018 jyly Aýstralııanyń ashyq birinshiliginde top jar­ǵan edi. Sodan bergi tórt jyl ýaqyt aralyǵynda nátıjesi kúrt tómendedi. Iаǵnı shaý tartyp qalǵan Federerdiń aldaǵy ýaqytta joǵaryda esimderi atalǵan qos myqtyǵa básekeles bola almaıtyny anyq. Sol sebepti de kimniń «Úlken dýlyǵa» dodalarynda eń kóp júlde alatyny Rafael Nadal men Novak Djokovıchtiń ózara tartysy arqyly anyqtalatyn sekildi.