QR Memlekettik keńesshisi Erlan Qarınniń tóraǵalyǵymen qazaq aǵartýshysy, ǵalym, aqyn, qoǵam qaıratkeri Ahmet Baıtursynulynyń 150 jyldyq mereıtoıyn daıyndaý jáne ótkizý jónindegi memlekettik komıssııanyń otyrysy ótti, dep habarlaıdy Egemen.kz Aqordanyń resmı saıtyna silteme jasap.
Jıynda jyl basynan beri mereıtoıdy ótkizý aıasynda birqatar mańyzdy ǵylymı-zertteý, aǵartýshylyq, mádenı-buqaralyq is-sharalar ótkizilgeni atap ótildi.
Erlan Qarın Ahmet Baıtursynulynyń murasyn nasıhattaýǵa baǵyttalǵan halyqaralyq, respýblıkalyq, óńirlik is-sharalardy jyl sońyna deıin joǵary deńgeıde ótkizý qajettigin atap ótti. Almatyda ǵalymǵa eskertkish ornatý josparlanǵan. Onyń 12 tomdyq tolyq shyǵarmalar jınaǵy basylymǵa daıyndalyp jatyr. IýNESKO-nyń shtab-páterinde jáne TÚRKSOI aıasynda is-sharalar ótkizý kózdelgen. TÚRKSOI uıymy jyl saıyn kórnekti túrkitanýshy ǵalymdarǵa beriletin Ahmet Baıtursynuly atyndaǵy tósbelgi taǵaıyndaý týraly sheshim qabyldady.
Otyrysta Ǵylym jáne joǵary bilim mınıstri Saıasat Nurbek, Mádenıet jáne sport mınıstri Dáýren Abaev, Syrtqy ister mınıstriniń birinshi orynbasary Aqan Rahmetýllın jáne Qostanaı oblysynyń ákimi Arhımed Muhambetov atqarylǵan jumystar men aldaǵy kezeńge arnalǵan josparlary týraly baıandady.
Aǵartýshynyń Qostanaı oblysyndaǵy týǵan jerinde ǵylymı-restavrasııa jumystary uıymdastyrylyp qana qoımaı, birqatar áleýmettik jáne ınfraqurylymdyq jobalar iske asyrylyp jatqanyn erekshe aıtý kerek.
Komıssııa otyrysyn qorytyndylaı kele, Memlekettik keńesshi Erlan Qarın Ahmet Baıtursynulynyń 150 jyldyq mereıtoıy aıasynda aldaǵy kezeńge josparlanǵan is-sharalardyń sapaly ótkizilýin qamtamasyz etýdi tapsyrdy.