Búgin Horvatııanyń astanasy – Zagrebte dzıýdodan Grand Slam týrnıri bastalady. Sońǵy kezderi súreńsiz óner kórsetip júrgen Qazaqstan quramasy úshin bul kezekti synaq. О́tken aptada Býdapeshttegi jarysta tas-talqan bolyp utylǵan jerlesterimiz osy joly óz jankúıerlerin qýantady dep úmittenemiz.
Ulttyq komandamyzdyń bas bapkeri Nurbol Súleımenov Horvatııaǵa 16 shákirtin aparýdy qup kórgen eken. Solardyń arasynan biz Eldos Smetovti bóle-jara atap ótýdi jón kórip otyrmyz. 60 kılo salmaqta kúsh synasqan kezinde atoı salǵan ol elimizdiń sporttyq dańqyn arttyrdy. Eki birdeı Olımpııa oıyndarynda jeńis tuǵyryna kóterildi. 2016 jyly Rıo-de-Janeıroda kúmis alsa, 2021 jyly Tokıoda qolaǵa qol sozdy. 2015 jyly Astanadaǵy álem chempıony atansa, 2019 jyly Japonııanyń astanasynda úshinshi oryndy ıelendi. Odan bólek, tarazdyq tastúlektiń Azııa oıyndarynyń jeńimpazy jáne qurlyq chempıony degen ataqtary taǵy bar. Biraq 66 kılo salmaqqa aýysqannan keıin qandasymyzdyń baǵy janbaı júr. Birqatar asa iri halyqaralyq týrnırde súringen Smetov bul kúnderi álemdik reıtıngte nebári 78-oryndy qanaǵat tutýda.
60 kılo salmaq dárejesinde beldesetin Maǵjan Shamshadınge de erekshe senim artylyp otyr. Syr boıynyń ókili kezinde jastar arasynda álem chempıony atanyp, basqa da dúbirli dodalarda daralandy. Eresekterdiń dúnıejúzilik dodasynda da jeńis tuǵyryna synyq súıem qalǵanda súrindi. Bıyl ol Tel-Avıvtegi týrnırde qola medaldi ıelendi.
Sondaı-aq Zagrebtegi tatamıde Nurdáýlet Amanqosov (60 kılo), Almas Ǵalymov (66 kılo), Erlan Serikjanov (73 kılo), Bekádil Shaımerdenov pen Abylaıhan Jubanazar (81 kılo), Ermahan Ánýarbekov pen Ersultan Muzapparov (90 kılo), Nurlyhan Sharhan (100 kılo) jáne Elaman Erǵalıev pen Ádil Orazbaev (+ 100 kılo) beldesedi. Al áıelder saıysynda Ǵalııa Tyńbaeva (48 kılo), Saltanat Sultanbekova (52 kılo), Baqyt Qusaqbaeva (57 kılo) jáne Arýna Jangeldına (78 kılo) baq synaıdy.