«Týr de Frans» kópkúndiginiń 11 kezeńi Nıderlandtyń Jumbo-Visma klýbynyń sapyndaǵy danııalyq veloshabandoz Ionas Vıngegordyń jeńisimen aıaqtaldy.
Albervıl men Kol-dıý-Granon aralyǵyn jalǵastyryp jatqan 151,7 shaqyrymdyq taýly aımaqty ol 4 saǵat 18 mınýt 02 sekýndta júrip ótti. Kolýmbııalyq Naıro Kıntana («Arkea-Samsic») ekinshi oryn alsa, fransııalyq Romen Barde («DSM») úshinshi satyǵa jaıǵasty. «Astananyń» serkesi Alekseı Lýsenko máre syzyǵyn segizinshi bolyp qıyp ótti. Joǵarydaǵy jeńisiniń arqasynda Ionas Vıngegor bes kezeń boıy eshkimge bet qaratpaı kelgen Tadeı Pogachardy tuǵyrdan taıdyryp, jalpy esepte kósh bastady. BAÁ-niń UAE Team Emirates klýby sapynda óner kórsetip júrgen Slovenııanyń sańlaǵy úshinshi satyǵa syrǵyp tússe, ekinshi orynǵa Romen Barde kóterildi. Biz úshin qýanyshty jaǵdaı, Lýsenko toǵyzynshy satyǵa turaqtady. Ol kósh basyndaǵy veloshabandozdan 8 mınýt 07 sekýnd qalyp keledi.
«Týr de Franstyń» aıaqtalýyna áli 10 kezeń bar.