Adamzat tirshiligine orasan qaýip-qaterimen kelgen koronavırýs pandemııasy áli de álemge ses bolyp tur. Birshama ýaqyt ájeptáýir saıabyrsyp qalǵan indet qazir kóptegen elde qaıtadan kúshine ene bastady. Bul qatarda bizdiń elde de epıdemııalyq ahýaldyń nasharlaı bastaǵany baıqaldy. Ásirese indettiń keń taralýy iri qalalarymyzda qatty sezilip, el boıynsha jalpy aýyrǵan adamdardyń 70%-yn qamtyp otyr.
17 shildedegi málimet boıynsha keıingi táýlikte elimizde 1 546 adamnyń koronavırýs ınfeksııasyn juqtyrǵany anyqtaldy. Qazirgi ýaqytta 7 571 adam indetten emdelip jatyr, onyń ishinde 680 pasıent stasıonarda, 6 891 naýqas ambýlatorııalyq deńgeıde em qabyldaýda. Aýrýǵa shaldyqqandardyń arasynda 15 adamnyń jaǵdaıy aýyr, úsh naýqastyń jaǵdaıy óte aýyr, bir naýqas О́JT apparatynda jatyr.
Koronavırýstyń taralýy qaıtadan qarqyn alyp, keıingi aptada aldyńǵy aptamen salystyrǵanda indet juqtyrǵandardyń sany 2,5 esege kóbeıdi. Bul rette Densaýlyq saqtaý mınıstri Ajar Ǵınııat Prezıdent janyndaǵy Ortalyq kommýnıkasııalar alańynda elimizdegi COVID-19 aýrýy boıynsha epıdemııalyq jaǵdaı týraly jan-jaqty málimet berdi.
«Álemde KVI-men syrqattanýdyń ósýi Qazaqstanda da sezilip, 20 maýsymnan bastap aýrýshańdyq beleń ala bastady. Keıingi aptada aldyńǵy aptamen salystyrǵanda aýrýshańdyq 2,5 esege – 1030-dan 2558 jaǵdaıǵa deıin ósti. Táýligine 1300-ge deıin KVI jaǵdaıy tirkelip jatyr. Syrqattanýdyń eń kóp taralýy megapolısterde – Almaty, Nur-Sultan jáne Shymkent qalalarynda baıqalýda. Keıingi aptada aýyrǵan adamdardyń 70%-y Almaty jáne Nur-Sultan qalalarynda tirkeldi. Maýsym aıynda júrgizilgen sekvenırleý qorytyndysy boıynsha Qazaqstanda úlgilerdiń 70%-y Omıkron VA.5 nusqasyna, qalǵan 30%-y jasyryn omıkron nusqasyna tán ekeni anyqtaldy», deıdi A.Ǵınııat.
Mınıstr syrqattanýshylyqtyń kóterilýine qaramastan, naýqastardy aýrýhanaǵa jatqyzý deńgeıi áli de tómen ekenin atap ótti. Onyń aıtýynsha, 15 shildedegi jaǵdaı boıynsha respýblıkada stasıonarlyq kómekti qýaty 3 282 tósektik oryndy quraıtyn 139 ınfeksııalyq aýrýhana kórsetedi, onda 570 pasıent emdeýge jatqyzyldy, osylaısha tósektik oryndardyń qamtylýy 20%-dy qurap otyr. Al reanımasııalyq tósektik oryndardyń 4%-ynda ǵana naýqas jatyr.
«Stasıonarlarda emdelip jatqan pasıentterge taldaý júrgizildi. Máselen, koronavırýspen stasıonarda jatqandardyń ishinde 18 jasqa deıingi balalar sany – 41,7%, onyń ishinde 1 jasqa deıingisi – 23%. Jalpy, el boıynsha 180 bala emdelip jatyr. Eresek pasıentter 58,3%-dy qurady. Ártúrli qatar júretin aýrýlary bar pasıentter – 23%. Reanımasııalyq naýqastardyń negizgi kontıngenti – ilespe aýrýlary bar 50 jastan asqan adamdar», vedomstvo basshysy.
Koronavırýspen aýyrǵan naýqastarǵa ýaqtyly medısınalyq kómek kórsetý úshin alǵashqy medısınalyq-sanıtarııalyq kómek deńgeıinde 2 387 mobıldi brıgada uıymdastyrylǵan, onyń ishinde aýyldarda myńnan asa mobıldi brıgada jumys istep jatyr. Rezervte 2 myńǵa jýyq mobıldi top daıyn tur.
«2022 jyldyń birinshi jartyjyldyǵynda mobıldi brıgadalar 815 myńnan asa qyzmet kórsetti. Eń kóbi Qaraǵandy, Nur-Sultan men Almaty qalalarynda júzege asyryldy. Bıylǵy 6 aıdyń qorytyndysy boıynsha koronavırýsqa kúdigi bar pasıentterge jedel medısınalyq kómek qyzmetin shaqyrý sany ótken jylǵa qaraǵanda azaıǵan. Barlyq medısınalyq kórsetkishter mınıstrliktiń kúndelikti baqylaýynda», dedi A.Ǵınııat.
Sonymen qatar mınıstr DDU usynymdary men halyqaralyq tájirıbeni eskere otyryp, COVID-19 epıdemııalyq jaǵdaıyn baǵalaý matrısasy qaıta qaralǵanyn, syrqattanýshylyq kórsetkishi aýrýhanaǵa jatqyzý kórsetkishimen aýystyrylǵanyn habarlady.
«Máselen, «jasyl aımaq» 2 500 naýqasqa deıin tósektik oryn bos bolmaǵan kezde; 5 myń naýqasqa deıin tósektik-oryn bos bolmaǵan jáne R reprodýktıvti sanynyń kórsetkishi 1-den kem bolǵan kezde belgilenedi. «Sary aımaq» shamamen 5 myń tósektik oryn jáne R1-den kóp bolǵan kezde nemese tósektik oryn 5 myńnan 10 myńǵa deıin jáne R1-den az bolǵan kezde belgilenedi. «Qyzyl aımaq» tósektik orynda 5 myń naýqastan jáne R1-den kóp bolǵan kezde nemese R-ge qaramastan 10 myńnan asa naýqasqa tósektik oryn bolǵan kezde belgilenedi. «Sary aımaqqa» kóshý kezinde ınfeksııa kózin oqshaýlaýǵa jáne minez-qulyq faktorlaryn kúsheıtýge baǵyttalǵan sharalar qabyldanady. О́ńirlerde «qyzyl aımaqqa» kóshý kezinde «sary aımaqta» qabyldanǵan sharalarǵa qosymsha stasıonar men MSAK júktemesine baılanysty eki kezeńde halyqtyń júrip-turýy men kásipkerlik sýbektileriniń qyzmetin shekteý sharalary qabyldanady. Sharalar qabyldaý jónindegi usynystar vedomstvoaralyq komıssııanyń qaraýyna engiziledi», dedi spıker.
Osy oraıda A.Ǵınııat KVI-ǵa qarsy vaksınalaý ınfeksııanyń aýyr túrlerinen jáne aýrýhanaǵa jatqyzýdyń aldyn alýdyń eń negizgi naqty sharasy ekenin taǵy da eske saldy.
«Vaksınalaý jáne revaksınalaý koronavırýstan jalǵyz qorǵanys bolyp qala beredi. Almaty jáne Nur-Sultan qalalarynyń aýyrǵandardyń 80%-y vaksına saldyrmaǵan nemese 6 aı buryn saldyrǵan adamdar ekeni rastaldy. Bul KVI-ǵa qarsy vaksınalaý mańyzdy ekenine taǵy da kózimizdi jetkizedi. Qazirgi ýaqytta Qazaqstanda vaksınalardyń 3 túri (KazVak, Sınofarm, Pfaızer), qaıta vaksınalaý úshin Kazvak jáne Sınofarm qoljetimdi. Egý pýnktterinde qalǵan vaksınanyń 1,6 mıllıon dozasy bar. Búginde KVI-ǵa qarsy vaksınalaýmen eresek turǵyndardyń 80%-dan astamy nemese barlyq halyqtyń 56%-dan astamy qamtylǵan. Birinshi komponentpen 10,7 mln adam, ekinshi komponentpen 10,4 mln adam vaksına saldyrdy. Táýligine 5 myńnan asa adam vaksınalaýdan ótip jatyr», dedi mınıstr.
Al respýblıka boıynsha KVI-ǵa qarsy bastapqy revaksınalaýmen qamtý tıisti halyqtyń 67,5%-dan astamyn qurady, ıaǵnı 4,9 mln adam qamtyldy.
«Mamyr aıynyń sońynan bastap biz qaıta revaksınalaýdy engizdik. Búgingi tańda 44%, ıaǵnı 260 myń adam qamtyldy. Aıta ketetini, COVID-19-ǵa qarsy revaksınalaý aldyńǵy vaksınalardyń kómegimen paıda bolǵan vaksınadan keıingi ımmýnıtetti saqtaýǵa jáne aǵzany aýrýdan qorǵaýdy kúsheıtýge baǵyttalǵan. Bir ókinishtisi, vaksınalanǵan adamdarda, sondaı-aq KVI-men aýyrǵan adamdarda ýaqyt óte kele deneniń ınfeksııadan qorǵalý deńgeıi tómendeıdi, nátıjesinde adam qaıtadan ınfeksııaǵa sezimtal bolady. Osyǵan baılanysty vaksınalaýdyń bastapqy kýrsyn alǵannan keıin 6 aıdan keıin KVI-ǵa qarsy revaksına alý usynylady», dep A.Ǵınııat sózin tolyqtyrdy.
Brıfıng barysynda mınıstr koronavırýstyń taralý qarqynyna baılanysty boljamdy da keltire ketti. Onyń aıtýynsha, Densaýlyq saqtaý mınıstrligi aı saıyn aldaǵy 3 aıǵa arnalǵan boljamyn jańartyp otyrady. Pessımıstik ssenarııde eń kóp tirkelgen jaǵdaılar táýligine 4 myń naýqasqa deıin, realıstik ssenarııde táýligine 2 500 jaǵdaıǵa deıin, optımıstik ssenarııde táýligine myń jaǵdaıǵa deıin bolady. Syrqattanýshylyq tamyz aıynda ósedi. Tamyz-qyrkúıek aıynyń sońynda tómendeı bastaıdy. Osy oraıda A.Ǵınııat qazaqstandyqtardy óz densaýlyǵyna qamqor bolýǵa shaqyryp, qoǵamdyq oryndarda jáne kólikte maska taǵý kerek ekenin, aýrýdyń alǵashqy belgileri baıqalsa, dárigerlerge habarlasý qajet ekenin aıtty.