Qazaqstanda 2022 jylǵy 1 shildedegi jaǵdaı boıynsha zeınetaqy tólemderiniń ortasha mólsheri 117 469 teńgeni qurady. Bul týraly QR Eńbek jáne halyqty áleýmettik qorǵaý mınıstrliginen habarlandy, dep jazady Egemen.kz.
«1 shildedegi jaǵdaı boıynsha qazaqstandyqtarǵa 1,4 trln teńgeden astam somaǵa zeınetaqy tólendi. 2022 jylǵy maýsymda respýblıkalyq bıýdjetten zeınetaqy tólemderine 261,9 mlrd teńge, onyń ishinde bazalyq zeınetaqyny tóleýge - 79,4 mlrd teńge, yntymaqty zeınetaqyny tóleýge - 182,6 mlrd teńge baǵyttaldy», delingen vedomstvo habarlamasynda.
2022 jylǵy 1 shildedegi jaǵdaı boıynsha elimizdegi zeınetkerler sany 2 mln 247 myń adamdy quraıdy.
«Búginde zeınetaqy tólemderiniń ortasha mólsheri (bazalyq zeınetaqy tólemin eskere otyryp) 117 469 teńgeni qurady», dep qosty vedomstvo.
Eńbek mınıstrliginde 2018 jylǵy 1 shildeden bastap memlekettik bazalyq zeınetaqy tólemi árbir alýshyǵa onyń zeınetaqy júıesine qatysý ótilin eskere otyryp, jeke taǵaıyndalatynyn eske saldy. Bul rette zeınetaqy júıesine qatysý ótiline 1998 jylǵy 1 qańtarǵa yntymaqty júıede jınaqtalǵan eńbek ótili, sondaı-aq mindetti zeınetaqy jarnalary tólengen kezeńder qosylady.
Máselen, eger zeınetaqy júıesine qatysý ótili 10 jáne odan az jyldy qurasa, sondaı-aq ol bolmaǵan kezde bazalyq zeınetaqy mólsheri eń tómengi kúnkóris deńgeıiniń 54%-yna teń bolsa, odan ári 10 jyldan asatyn árbir jyl úshin onyń mólsheri 2%-ǵa artady.
Mysaly, 20 jyl qatysý ótili kezinde bazalyq zeınetaqy eń tómengi kúnkóris deńgeıiniń 74%-yn, 30 jyl-eń tómengi kúnkóris deńgeıiniń 94%-yn quraıdy. Eńbek ótili 33 jáne odan kóp jyl bolǵan jaǵdaıda ol eń tómengi kúnkóris deńgeıiniń 100%-y mólsherinde belgilenedi.
Eger Biryńǵaı jınaqtaýshy zeınetaqy qoryna MZJ aýdarý bir aıda birneshe ret júzege asyrylsa, jınaqtaýshy júıege qatysý kezeńi bir aıdy quraıdy. Osylaısha, mindetti zeınetaqy jarnalary qanshalyqty turaqty jáne tolyq kólemde tólenetin bolsa, zeınetaqy jasyna jetken kezde bazalyq zeınetaqy tóleminiń mólsheri de sonshalyqty joǵary bolady.
Sondaı-aq vedomstvoda jasyna baılanysty zeınetaqy tólemderiniń mólsheri 1998 jylǵy 1 qańtardaǵy jaǵdaı boıynsha eńbek ótiline (keminde alty aı talap etiledi) jáne zeınetaqy aldyndaǵy kezeńde alynǵan ortasha aılyq kiriske baılanysty ekenin atap ótti.