Bir kartınanyń jumbaǵyn sheshý úshin, onyń tarıhy men evolıýsııasyna úńilseńiz jetip jatyr. Boıaýdyń qupııasy, kórkem keńistiktegi beımálim jaryqtar, bulyńǵyr beıneler ózi-aq jan syryn jaıyp salady. Túster bekerden-beker sharpyspaıdy, onda sýretkerdiń ıdeıasy men ómirdiń ińkárligi bar. Armanshyl arýdyń alaqanyna qonǵan kún sáýlesi sekildi...
Sýretshi Marat Turǵambaı boıaý jaǵysynda erekshe tásilderdi paıdalanady. Baqsańyz, keıbir kartınalarynda karnasııa tehnıkasynyń áseri baıqalady. Keskindemeleri shynaıy ári jandy detaldarǵa toly. Beıne bir fotosýret sııaqty kóńilińizdi birden baýrap alady. Shynynda, olar gıperrealızmdik baǵyttaǵy shyǵarmalar bolyp sanalady. Máselen, «Arman» atty kartınasyn alyp qarańyzshy.
Kezekti jumysynda sýretshi peızaj ben keıipkerdi ózara baılanystyrady. Bul sımvolızmge jaqyn kartınalardyń biri desek te bolady. Sebebi tabıǵat pen keıipker bir-birimen úılesim taýyp, tildesip tur. Týyndynyń aldyńǵy planynda qııalǵa berilgen qyz beınesi kórinse, artqy planda tabıǵat aıasy beınelengen. Qyzdyń dene bitimi kórkem oryndalǵan.
Jalpy, kartınada turlaýsyz tirshilikten mezi bolyp, bir kúndik demalysyn ózine arnaǵan arý kórinis tapqan. Iаǵnı taý bókterine seıilge shyǵyp, qııalyna erik bergen qyz obrazy sýrettelgen. Ol sol qolyn aspanǵa sozyp, samal jeldiń salqyn lebin sezinýde. Armanyna qol sozǵan beıkúná jannyń beınesinde. Qııal álemine shomyp, kenet ómirinde bir uly ózgeris bolatynyna úmittenedi.
Sýretshi keıipkerin shynaıy ómirden alǵanyn, taǵdyrly qyz ekenin aıtady. Ol meıirim men sulýlyqtyń hanshaıymy, áıtse de, sóıleý men estý qabiletinen aıyrylǵan. Sodan da bolar arýdyń arpalysqa toly taǵdyry sýretshini beı-jaı qaldyrmaǵan. Onyń ǵazal ǵumyry qylqalam ıesin eleńdetip, kórkem shyǵarma jazýǵa ıtermeleıdi. Talaıly taǵdyrly arýdyń sulýlyǵyn oqyrmanǵa jetkizý úshin osyndaı qadamǵa barǵan.
«Arman» týyndysyndaǵy arý bir ǵajaıyp sátti kútý ústinde. Taramys taǵdyrdyń taýqymeti bir sátte toqtap, jańa bir sezimderdi bastan ótkizetinine senedi.