Qazaqstandyq oqýshylar halyqaralyq pán olımpıadalarynda el namysyn qorǵap, jaqsy nátıje kórsetip jatyr. Gazetimizdiń ótken nómirlerinde fızıka men matematıka pánderinen halyqaralyq jarysta top jarǵan órenderimiz týraly jazyp, súıinshilegen edik. Mine, endi daryndy darabozdarymyzdyń Geografııadan halyqaralyq olımpıadadaǵy jetistigin súıinshileýdiń sáti túsip tur.
Olar Geografııadan halyqaralyq olımpıadada (IGeO-2022) 1 altyn, 1 qola medal jeńip aldy. Ulttyq qurama qorjynyna altyn medaldy Sanjar Hamıtov (Aqtóbe qalasynan), qola júldeni Erkebulan Tazabek (Shymkent qalasynan) saldy. Oqý-aǵartý mınıstri Ashat Aımaǵambetovtiń habarlaýynsha, bul – elimizdiń bedeldi olımpıadaǵa qatysý tarıhyndaǵy qazaqstandyqtardyń ekinshi altyn medali.
«Bıyl zııatkerlik jarystardy Fransııa uıymdastyrdy. Pándik olımpıadalarǵa álemniń 54 elinen 216 oqýshy qatysty. Balalarymyzdyń matematıka, fızıka jáne endi geografııa pánderinen olımpıadalardaǵy joǵary jetistikteri olardyń básekege qabiletti ekenin kórsetedi. Oqýshylardy jeńisimen quttyqtaımyn! Biz olardy maqtan tutamyz. Sondaı-aq balalarǵa sapaly bilim berip jatqan ustazdarǵa sheksiz alǵysymdy bildirgim keledi. Daryndy balalardy tárbıelegen ata-analarǵa da rahmet», dedi vedomstvo basshysy.
Mınıstrdiń málimdeýinshe, bıyl osyndaı olımpıadalardyń jeńimpazdary buryn-sońdy bolmaǵan qoldaý sharalarynyń ıgiligin kóredi. Prezıdenttiń tapsyrmasy boıynsha qomaqty aqshalaı syıaqy tóleý jáne otandyq JOO-ǵa UBT tapsyrmaı-aq qabyldaý qarastyrylyp otyr. Altyn medal alǵan oqýshyǵa shamamen 4,5 mln teńge, kúmis medalǵa 3 mln-nan asa teńge, qola medalǵa 1,5 mln-nan asa teńge kóleminde aqshalaı syılyq beriledi. Oqýshylardy jarysqa daıyndaǵan ustazdar da tólemaqy alady.