Jergilikti mal ósirýshiler tórt túlikke sýbsıdııa bólý kezinde usaq sharýashylyqtardyń eskerýsiz qalatynyna narazy. Sharýalar sońǵy ýaqytta mal azyǵyn daıyndaýda qıyndyqtar týyndaǵanyn aıtady. Shyǵyndary shash etekten asyp, baǵasy aspandap ketken aýylsharýashylyq tehnıkalaryn satyp ala almaı otyr.
О́ńirlik «Atameken» kásipkerler palatasynda etti mal sharýashylyǵyn ustap otyrǵan sýbektilerdi qoldaý máseleleri boıynsha jıyn ótti. Is-sharaǵa oblys ákiminiń orynbasary Meıram О́teshov qatysyp, mal baǵatyn aǵaıynnyń kóńilindegi alańdaýshylyqtarǵa nazar aýdardy.
– О́ńirimizde et baǵytynda mal ósirip otyrǵan sharýashylyqtar barshylyq. Shaǵyn fermerlik sharýashylyqtardyń basym bóligi sýbsıdııalaý kólemin ótken jyldyń deńgeıinde qaldyrýdy suraıdy. Sharýalar óńirde asyl tuqymdy túlik kóbeıse, iri nemese usaq maldyń basyna beriletin sýbsıdııa somasy azaıyp qala ma dep alańdaıdy. Sondyqtan bul máselelerdi eskerip, olardy qoldaýdyń tetikterin qarastyrý qajet, – dedi Meıram О́teshov.
О́ńirlik kásipkerler palatasynyń dırektory Serik Sádýaqasov byltyr kásipti endi qolǵa alǵan sharýashylyqtarǵa jemshóp daıyndaý úshin sýbsıdııa berile bastaǵanyn eske saldy. «Sýbsıdııa bóline bastaǵan soń aımaǵymyzda fermerlik sharýashylyqtardyń sany kóbeıgenin qalaımyz. Mal basy jyldan-jylǵa ósýi zańdylyq. Osyǵan nazar aýdarǵan durys», degen oıymen bólisti ol.
«Agrofırma Aqjar О́ndiris» JShS basshysy Gúlzıra Qazylova et baǵytyndaǵy mal ósirýshiler kóterip otyrǵan máseleler óte ózekti ekenin jetkizdi.
Al jergilikti «Agroexport Pavlodar» JShS-niń ıesi Qanatbek О́zembaev sýbsıdııa bólýde barlyǵyna birdeı teń quqyq berilýge tıis dep sanaıdy.
– Bul baǵytty sýbsıdııalaýǵa bıýdjetten qarajat az bólinetini baıqalady. Jaýapty basqarma aldymen úlken sharýashylyqtardy jarylqaıdy. Aqyr sońynda usaq sharýalarǵa qarjy jetpeı qalyp, úmitimiz úziledi. Jyl saıyn qoldaýdan qaǵylamyz. Byltyr shóptiń bir oramy 12 myń teńgeden satyldy. Mal azyǵyn daıyndaý úshin de shyǵyndarymyz ósip ketti. Dızel otyny, qajetti tehnıka, tehnıkanyń qosalqy bólshekteriniń baǵasy bıyl múlde sharyqtap tur. Et baǵytyndaǵy mal sharýashylyǵymen aınalysatyn fermerlerdiń ótinishi eskerilip, bizge sýbsıdııa bólinse degen tilegimiz bar, – degen ótinishin jetkizdi sharýa.
Sharýashylyq basshysynyń aıtýynsha, quny jyl basynda 8 mln teńge bolǵan MTZ traktory qazir 10 mln teńge turady. «QazAgroQarjy» AQ-da qýattylyǵy ortasha traktor tehnıkalarynyń baǵasy 12 mln teńgege deıin qymbattap ketken.
Murat QAPANULY,
jýrnalıst
Pavlodar oblysy