Oqýshylardyń jazǵy kanıkýly bastalysymen balalardyń qaýipsizdigi máselesi aldan shyǵady. Ata-analardyń qaraýynsyz túngi ýaqytta serýendep, sýǵa shomylýǵa ruqsat etilmegen jerlerdi jaǵalap ketetin jetkinshekter bar. Munyń arty qaıǵyly jaǵdaıǵa aparatyn oqıǵalar az emes.
Jaǵymsyz jaǵdaıdyń aldyn alý úshin Ishki ister mınıstrligi jedel-aldyn alý sharalaryn jıi uıymdastyrady. Atap aıtsaq, «Túngi qaladaǵy balalar», «Sý qoımalaryndaǵy balalardyń qaýipsizdigi» sııaqty aksııalar ótkizilýde. Polıseıler qalalar men aýdan kóshelerinde, oıyn-saýyq mekemelerinde, kompıýterlik klýbtarda kúsheıtilgen reıdter júrgizip jatyr. Balalardyń sý aıdyndarynda qaraýsyz qalmaýyna da erekshe nazar aýdarylýda. Tártip saqshylary ata-analarǵa kámeletke tolmaǵandardyń túngi ýaqytta zańdy ókilderimen erip júrý kerektigi týraly eskertýde.
Esterińizge salsaq, kámeletke tolmaǵan balany tárbıeleý nemese bilim berý, onyń quqyqtary men múddelerin qorǵaý jónindegi mindetterin oryndamaǵany úshin Ákimshilik quqyq buzýshylyq týraly kodekstiń 127-baby boıynsha ata-ana jaýapkershilikke tartylady. Sondaı-aq kámeletke tolmaǵandardyń zańdy ókilderiniń erip júrýinsiz túngi ýaqytta oıyn-saýyq mekemelerinde bolý faktileri tirkelse, Ákimshilik quqyq buzýshylyq týraly kodekstiń 442-baby 1-bóligi boıynsha ata-analar jazalanyp, Kodekstiń 132-baby boıynsha kásipkerlik sýbektileri jaýapqa tartylady.
Belgili bolǵandaı, oıyn-saýyq mekemesine kelýshiniń jasyn sol mekemeniń qyzmetkeri anyqtaýy kerek. Kelýshiniń jasyna qatysty qandaı da bir kúmán týyndaǵan jaǵdaıda qyzmetker kelýshiniń jasyn jeke kýáligin kórsetý arqyly dáleldeýdi talap etýge quqyly.
«Sý qoımalaryndaǵy balalardyń qaýipsizdigi» aksııasy sheńberinde polıseıler kópshilik demalatyn oryndardy, sý qoımalaryn jáne jaǵajaılardy aralap, arnaıy eskertý paraqshalaryn taratyp, sýdaǵy qaýipsizdik erejelerin túsindiredi. Munymen másele sheshile qoımas. Kez kelgen ata-ana balanyń jazǵy kezeńdegi qaýipsizdigi týraly umytpaýy kerek. Sondaı-aq ata-analar kámeletke tolmaǵan adam túnde kóshede júrgende qylmystyń obektisi nemese sýbektisi bola alatynyn uǵynýǵa tıis. Iаǵnı ony tonap, uryp-soǵýy nemese ózi de qandaı da bir quqyq buzýshylyq jasaýy múmkin.
Zańdy ókilderiniń erip júrýinsiz balalar men jasóspirimder oıyn-saýyq mekemelerinde tek saǵat 22.00-ge deıin, al kóshede saǵat 23.00-ge deıin bolýǵa ruqsat etiledi. Reıdter baý-baqsha, fermerlik alqaptar, sharýa qojalyqtary, úılerdiń jertóleleri, temir jol jáne avtobýs vokzaldarynda da júrgizilip jatqanyn atap ótken jón. Kóp jaǵdaıda eńbek sharttary jasalmaı, balalar eńbegin zańsyz paıdalaný faktileri tirkeletin kórinedi.