2022 jyldyń 1 jartyjyldyǵynda memlekettik bıýdjetke salyq túsimderi boıynsha jospar 106,4%-ke oryndalyp, 7,15 trln teńge túsken. Bul týraly Qarjy vıse-mınıstri Erjan Birjanovtyń tóraǵalyǵymen ótken Memlekettik kirister komıtetiniń alqa otyrysynda málim boldy, dep habarlaıdy Egemen.kz.
Jıynda osy jyldyń birinshi jartyjyldyǵynyń respýblıka boıynsha memlekettik kirister organdarynyń jumysy qorytyndylanyp, ekinshi jartyjyldyqqa mindetter anyqtaldy jáne tapsyrmalar berildi.
«2022 jyldyń 1 jartyjyldyǵyna memlekettik bıýdjetke salyqtyq túsimder boıynsha jospar 106,4%-ke oryndalyp, 7,15 trln teńge túsken. О́tken jyldyń sáıkes kezeńimen salystyrǵanda, memlekettik bıýdjetke salyqtyq túsimder 2,3 trln teńgege kóbeıip, 1,5 esege ósken», delingen habarlamada.
Komıtettiń málimetinshe, atalǵan kezeńde bıýdjetke 567,2 mlrd teńge somasyndaǵy qosymsha rezerv túsimderi qamtamasyz etildi. Kameraldyq baqylaý men salyq aýdıtiniń tıimdiligi 162,7 mlrd teńgege ósken.
«2022 jyldyń 1 jartyjyldyǵynda memlekettik kirister organdary salyq jáne kedendik baǵyttaǵy 9,9 mln memlekettik qyzmet kórsetken, onyń ishinde 99% elektrondy túrde bolǵan. О́tken jyldyń sáıkes kezeńimen salystyrǵanda elektrondy qyzmetter sany 1,9%-ke ósken. Odan bólek, memlekettik kirister organdarynyń Baılanys ortalyǵyna keńes alý úshin habarlasqan azamattardyń 97%-i operatorlardyń jumysyna oń baǵa bergen», dep atap ótti vedomstvo ókilderi.
Alqa májilisiniń qorytyndysy boıynsha aýmaqtyq departamentterge sybaılas jemqorlyqpen kúres, bıýdjetke salyq jáne kedendik túsimder josparyn oryndaý, sondaı-aq qosymsha rezervter túsimin qamtamasyz etý jónindegi jumysty jalǵastyrýǵa tapsyrma berildi.