Biz, Qyzylorda qalasyndaǵy Qaınarbaev kóshesiniń turǵyndary kóshemizdegi kir-qoqystan aıtarlyqtaı zardap shegip kelemiz. Oǵan asfalt tóselmegen, ásirese jańbyrly kúnderi laı-batpaqtan aıaq alyp júre almaı qalamyz.
Alda-jalda bireý-mireý qatty syrqattanyp qalsa, jedel járdem máshınesi de úı aldyna asa jaqyndaı almaıdy. О́ıtkeni oıdym-oıdym joldan ótý múldem múmkin emes. Qysqasy, osy kósheni tegistep, asfalt tóseý, tazalap turý sııaqty jumystarǵa uzaq ýaqyttan beri eshkimniń tarapynan eshqandaı mán berilmeı kele jatyr.
Tazalyqqa baılanysty negizgi problema esikterimizdiń aldyndaǵy úlken oıyqtan týyndap otyr. Ol buryn-sońdy tastalǵan kúl-qoqysqa toly. Ishinde ne joq deısiz – turmystyq qaldyqtardyń bári bar. Jel tursa, kúl-qoqystan, túrli qaldyqtan shyqqan jaǵymsyz ıis qolqany qabady. Tipti jaz aılarynda esik aldyna shyǵyp, damyldap otyra da almaımyz. Kishkentaı oıyn balalary las zattardy ustaıdy, odan qalsa, shyny kesikterine qoldaryn jaraqattap alyp ta jatady. Al joǵarydan tómenge deıin balanyń densaýlyǵy basty nazarda bolýǵa tıis deımiz.
Kóshe turǵyndary jatpaı-turmaı aryzdanǵan jaǵdaıda tazalyqqa jaýapty mekemeniń jumysshylary kelip, kúl-qoqys pen túrli qaldyqty qappen jınaǵan boldy. Talaı jyldan beri qordalanǵan qoqysty qappen jınap taýysý múmkin emes. Bizdińshe, úlken júk kólikterimen qum, topyraq ákelip, oıyqtyń betin tegistep jaýyp tastamaı, bul másele esh sheshilmeıdi.
Osy oraıda biz, Qaınarbaev atyndaǵy kóshe turǵyndary qala men oblys basshylyǵyna jetkilikti deńgeıde qarjy qarastyryp, bizdiń problemamyzdy túpkilikti sheship berse eken degen ótinish aıtamyz jáne de ótinishimiz aıaqsyz qalmaıdy dep úmittenetinimizdi bildiremiz.
A.MAShBEKOVA,
A.ASÝBAEVA, t.b.
Hatqa barlyǵy 10 adam qol qoıǵan
QYZYLORDA