hr.enbek.kz eńbek resýrstary portalynda «Qyzmetkerdiń jeke isi» servısi iske qosyldy. Atalǵan servıs jumys berýshige jumysqa ornalasatyn qyzmetker týraly málimetterdi elektrondy túrde alýyna múmkindik beredi. Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti habarlady.
«Qyzmetkerdiń jeke isi» servısiniń kómegimen jumys berýshi jumysqa turýǵa talaptanýshynyń nemese qyzmetkerdiń kelisimimen jumysqa ornalasý kezinde qajetti qujattardyń elektrondy paketin suraı alady, sondaı-aq qyzmetkerdiń basqa jumyspen qamtylýyn teksere alady. Jeke tulǵanyń derbes derekterin óńdeýge kelisimin úshinshi tulǵalarǵa berý úshin Sıfrlyq damý, ınnovasııalar jáne aeroǵarysh ónerkásibi mınıstrliginiń derbes derekterge qoljetimdilikti baqylaý servısi arqyly mobıldi azamattar bazasynda tirkelgen qyzmetkerdiń nómirine SMS joldaý arqyly nemese hr.enbek.kz portalynda ESQ kómegimen kelisimge qol qoıý arqyly júzege asyrylady.
Osylaısha, aqysyz negizde mynadaı aqparatty alýǵa bolady: jeke kýáliktegi aqparat; fotosýretter; bilimi týraly aqparat; psıho-narkologııalyq jáne týberkýlez dıspanserlerinde esepte turǵany týraly aqparat; 0/75ý medısınalyq anyqtamadan málimetter; eńbek sharttaryn esepke alýdyń biryńǵaı júıesinen jumys tájirıbesi týraly aqparat; vaksınalaý týraly aqparat.
Jumys berýshi hr.enbek.kz eńbek resýrstary portaly arqyly tańdaý úshin kez kelgen qoljetimdi tegin aqparatty suratýǵa quqyly. Kadrlyq qamtamasyz etýdiń aqparattyq júıeleri bar jumys berýshilerge Smart Bridge arqyly ıntegrasııalaý negizinde tegin qyzmetke qosylý múmkindigi beriledi.
Atalǵan portalda 2022 jyldyń maýsymynda iske qosylǵan «Qyzmetkerdiń jeke kabıneti» servısi quryldy. Onda óz eńbek sharttaryńyzdy kórýge, jumys ornynan anyqtamany júkteýge, sondaı-aq derbes derekterdi óńdeýge kelisimge qol qoıýǵa jáne bolashaqta qashyqtyqtan elektrondy eńbek shartyn jasasýǵa bolady.
Jumys berýshi úshin portalda eńbek sharttaryn tirkeý, qaraý, túzetýler men tolyqtyrýlar engizý, áleýmettik demalystardy tirkeý, kásiporyndy aýystyrý jáne qaıta uıymdastyrý, jeke isti qalyptastyrý boıynsha servıs fýnksııalary qoljetimdi, sondaı-aq anonımdi túrde nemese jaqyn arada eńbek zańnamasyn buzý týraly test tapsyrýǵa ruqsat etiledi.