О́tken jyly ınternet pen baılanys qyzmetin sapasyz kórsetken operatorlarǵa 135 mln teńge aıyppul salyndy. Bul týraly Sıfrlyq damý, ınnovasııa jáne aeroǵarysh ónerkásibi vıse-mınıstri Ashat Orazbek málim etti, dep habarlaıdy Egemen.kz.
Onyń atap ótýinshe, búginde elimizdiń 99 paıyzy ınternetpen qamtylǵan. Biraq, bul ınternet pen baılanys qyzmeti tek aýyldyq eldi mekenderde ǵana emes sonymen birge qalalarda da sapaly dep aıtýǵa kelmeıdi.
«Eń aldymen, bıyl Ákimshilik quqyq buzýshylyq týraly kodekste ınternetke mobıldi keńjolaqty qoljetimdilikti sapasyz kórsetkeni úshin aıyppul kólemin arttyrdyq. Ekinshiden, ótken jyly ınternetke qoljetimdiliktiń ár túri boıynsha shekti mán engizdik: 3G úshin sekýndyna 1 megabıt, 4G úshin sekýndyna 5 megabıt. Qazaqstannyń búkil aýmaǵy boıynsha sapany tekserý baǵytynda da úlken jumys atqaryp jatyrmyz. «Memlekettik radıo jıilik qyzmeti» azamattardyń shaǵymymen únemi óńirlerge shyǵyp turady», dedi Ashat Orazbek elordada ótip jatqan «Sıfrlyq Qazaqstanǵa betburys» atty halyqaralyq forýmda.
Vıse-mınıstrdiń aıtýynsha, ótken jyly 500-den astam tekserý júrgizildi. Azamattardyń shaǵymynyń basym bóligi mobıldi jeli arqyly ınternetke qoljetimdiliktiń sapasyzdyǵyna qatysty boldy.
«Biz aıyppul kólemin 10 esege arttyrdyq. Qazirgi ýaqytta azamattardyń aryzy boıynsha baılanys sapasynyń buzylǵanyn anyqtasaq, onda baılanys operatory 500 AEK aıyppul tóleıdi. Al buzýshylyq qaıta anyqtalǵan jaǵdaıda, ıaǵnı baılanys áli de sapasyz kórsetilse, onda aıyppul 1,5 myń AEK bolady. О́tken jyly 500-den astam tekserý júrgizilip, 135 mln teńgege aıyppul salyndy», dedi ol.