Elimizdiń rýhanı ordasy Almatyda «Abaı kúnine» arnalǵan birqatar sharalar shoǵyry ótti. Megapolıs turǵyndaryna erekshe kóńil kúı syılaǵan mazmundy jobalar rýh merekesiniń mańyzyn arttyra túskenin aıtýǵa tıispiz.
«Abaı kúnin» merekeleý aqyn eskertkishiniń aldyna gúl shoqtaryn qoıyp, uly tulǵanyń rýhyna taǵzym etýmen bastaldy. Is-sharaǵa qabyrǵaly qalamgerler bastaǵan zııaly qaýym, qala bıliginiń ókilderi men jas abaıtanýshylar qatysty. Aǵa býyn jastarǵa taǵylymdy oı tastap, Abaı álemine taza kóńilmen úńilýge shaqyrdy.
«Alataý» dástúrli óner teatrynyń qyz-jigitteri metroǵa túsip, jolaýshylardy Abaı ánderimen sýsyndatty. Mýzykalyq aspaptar asynǵan kásibı sheberler bázbir tutas teatr metroǵa kóship kelgendeı áser syılady. Osylaısha, sulý sóz ben syrly sazdan qýat alǵan almatylyqtar jumysqa shat kóńilmen attandy. О́nerpazdarǵa rızashylyq kóńilin bildirgen turǵyndar alǵysyn aıtyp, qarııalar batasyn berdi.
«Rasynda jumysqa erekshe kóńil kúımen bara jatyrmyz. Búgin halqymyzdyń uly aqynynyń týǵan kúni ekenin bireý bilse, bireý bilmeýi múmkin. О́zim de bul kún resmı túrde «Abaı kúni» dep atalǵanyn búgin bilip otyrmyn. Budan bylaı júrgen jerimde aıta júremin. О́nerpazdarǵa kópten-kóp rahmet, Abaı ánderin bárimiz qosyla shyrqadyq», deıdi qala turǵyny Beıbit Esenbaev.
«Abaı kúnin» aıryqsha atap ótken «Alataý» teatry keshke qaraı «Kún artynan kún týar» atty teatrlandyrylǵan konsertimen kórermenge ádemi áser syılady. Keshte hakimniń «Kózimniń qarasy», «Aıttym sálem Qalamqas», «Tatıananyń áni», «Qarańǵy túnde taý qalǵyp» sekildi tanymal ánderi oryndaldy.
Á.Qasteev atyndaǵy óner mýzeıinde «Abaı shyǵarmalaryna arnalǵan ıllıýstrasııalar» taqyrybynda tanymdyq dáris ótip, kemeńger tulǵanyń keneptegi kesek beınesin pash etken arnaıy kórme uıymdastyryldy. Uly tulǵanyń obrazdary men shyǵarmalaryna arnalǵan qylqalam sheberleriniń keskindemelik, grafıkalyq jáne músindik týyndylary ataýly kúnniń mańyzyn salmaqtaı tústi. О́nertanýshy Sandýǵash Myrzabekova júrgizgen dáris barysynda Abaı beınesine jáne onyń murasyna sýretshiler kózimen qaıta qaraýǵa shaqyratyn paıymdy pikirler aıtyldy. «Qoǵam ózgerdi, álemdik órkenıetke erkin aralasyp, rýhanı dúnıege jańasha qaraýdyń úlgisin tanı bastadyq, jańa ádistemeler men tehnologııalar tasqyny da aǵylyp kelip jatyr. Sýretshilerimiz úshin Abaı beınesi, onyń shyǵarmalaryndaǵy obrazdar tyń keıipte ashyla bastady», deıdi ónertanýshy.
Shahardaǵy taǵy bir mádenıet oshaǵy Memlekettik Ortalyq mýzeıde ótken «Júrektiń kózi ashylsa» atty ádebı-shyǵarmashylyq kesh shymyldyǵy «Temiren» teatry sahnalaǵan mono-dramamen ashylyp, aqyndar men ánshilerdiń án-jyr shashýyna ulasty. Jınalǵandardy óner ordasynyń dırektory Rashıda Harıpova, Qazaqstan Jazýshylar odaǵy tóraǵasynyń orynbasary Baýyrjan Jaqyp bastaǵan qonaqtar quttyqtap, tutas el kóleminde atalyp ótip jatqan «Abaı kúniniń» mańyzyna toqtaldy. Dástúrli ándi dáriptegen Erkin Shúkimanov, Saıat Nurǵazınder Abaı ánderin tebirene shyrqap, Álibek Shegebaı, Ásel Ospan, Aıgúl Jumadil qatarly aqyndar oıshylǵa arnaǵan óleńderin oqydy. Mýzeı tórinen oryn alǵan «Uly dalanyń uly aqyny» kórmesi Abaı beınesine tereńnen úńilýge shaqyrady. Toptama mýzeı qoryndaǵy aqyn ómiri men shyǵarmashylyǵyna qatysty shoqtyǵy bıik shyǵarmalardy qamtyǵan.
Tanym ordasynyń talaı tarıhyn kózdiń qarashyǵyndaı saqtap otyrǵan Almaty mýzeıi de Abaı kúnin merekeleýden qalys qalǵan joq. Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq mýzeı qorynan arnaıy ákelingen eksponattar kelýshiler nazaryna usynyldy. Mýzeı qonaqtary Abaı álemine qatysty tyń derekterge qanyǵyp, aqynnyń týǵan jeri, ósken ortasy týraly ázirlengen beınematerıalmen tanysty.
Sondaı-aq bul kúni Ulttyq kitaphanasynda, joǵary oqý oryndarynda poezııa keshteri ótip, Abaı murasy asqaqtady. Uly aqynnyń asyl murasyn nasıhattaý men jas urpaq boıyna sińirýge baǵyttalǵan ıgi sharalar Almaty qalasynda tamyz aıynyń sońyna deıin jalǵasady.
ALMATY