Qazirgi kezde elimiz óńirlerinde respýblıkalyq «Mektepke jol» aksııasy jalǵasyn tabýda. Almaty qalasynda da qarqyn alǵan bastama aıasynda muqtaj otbasylardan shyqqan 19 myń oqýshyǵa kómek kórsetilip, olarǵa ákimdik tarapynan mektep formasy men keńse kerek-jaraqtaryn satyp alýǵa qoldaý kórsetiledi. Bul maqsatqa jergilikti bıýdjetten 800 mln teńge qarastyrylyp otyr.
Bıyl aksııa 30 qyrkúıekke deıin jalǵasyp, «Mektepke jol – shekarasyz jaqsylyq» uranymen ótedi. Ol az qamtylǵan jáne kópbalaly otbasylardan shyqqan oqýshylarǵa, jetim balalarǵa, sondaı-aq ata-anasynyń qamqorlyǵynsyz qalǵan balalarǵa oqý jylynyń bastalýyna daıyndyq kezinde materıaldyq qoldaý kórsetýge jáne áleýmettik sebepter boıynsha balalardyń mektepke qalmaı kelýine baǵyttalǵan.
О́ńirlik kommýnıkasııalar qyzmetinde osy baǵyttaǵy sharalar týraly baıandaǵan Almaty qalasy bilim basqarmasynyń basshysy Lázzat Jylqybaeva oqýshylarǵa oqý jylyna daıyndyqqa kómek kórsetý boıynsha jumystar iske asyp jatqanyn jetkizdi. Osy oraıda kómekke muqtaj balalardyń derekter bazasy qurylyp, jedel jeliler, senim telefondary jumys isteıdi.
Al qaıyrymdylyq kómek kórsetýge demeýshiler, mesenattarmen qatar memlekettik qurylymdardy tartý jumystary iske asýda. Balalarǵa mektepke daıyndalýǵa kómek kórsetýge tilek bildirýshiler turǵylyqty jeri boıynsha aýdandyq bilim bólimderine nemese tikeleı bilim berý uıymyna habarlasa alady.
Jedel jelige qatysty aqparattar Almaty qalasy bilim basqarmasynyń saıtynda kórsetilgen. L.Jylqybaevanyń aıtýynsha, 1 qyrkúıekten bastap memlekettik mektepterde bilim alatyn 1-4-synyp oqýshylaryn tegin tamaqtandyrýǵa baılanysty ázirlik júrýde. Sonymen qatar oqýshylar qaıtarymdy negizde oqýlyqtarmen qamtylatyn bolady.
ALMATY