Nur-Sultan qalasynda 2 jyl boıy halyqaralyq izdeýde júrgen kúdikti ustaldy, dep habarlaıdy Egemen.kz.
Qyzylorda oblysy polısııa departamenti krımınaldyq polısııa basqarmasy men Nur-Sultan qalasy polısııa departamentiniń qyzmetkerleri jedel izdestirý sharalaryn júrgizdi.
«Nátıjesinde 2020 jyldan beri tergeýden boı tasalap, halyqaralyq izdeýde júrgen Qyzylorda oblysynyń 31 jastaǵy turǵynyn elordada ustady. Ol QR Qylmystyq kodeksiniń 297-baby 3-bóliginiń 1,3-tarmaǵy boıynsha qylmys jasaǵan degen kúdikke ilikken. Onda esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý jaǵdaıy kórsetilgen», delingen Qyzylorda oblystyq polısııa departamenti taratqan aqparatta.
Vedomstvo ókilderi naqtylaǵandaı, kúdiktige qatysty kúzetpen ustaý túrindegi bultartpaý sharasy tańdalyp, ýaqytsha ustaý ızolıatoryna qamaýǵa alyndy.