Ekinshi deńgeıli bankterdiń jıyntyq qaryz portfeli bir aıda 3,2 paıyz nemese 656,2 mlrd teńgege kóbeıgen. 2022 jyldyń 1 shildesindegi jaǵdaı boıynsha qaryz portfeliniń kólemi – 21,3 trln teńge. Sonyń 20,1 trln teńgesi – TOP-10 banktiń enshisinde. Úzdik ondyqtaǵy qaryz portfeliniń aılyq ósimi 3,5 paıyz nemese 673,8 mlrd teńgeni quraǵan.
Bank nesıesiniń kólemi boıynsha ForteBank kósh bastap tur. Bul banktiń nesıe ósimi bir aıda 9,6 paıyz, 94,2 mlrd teńgege ósip, qaryz portfeli 1,1 trln teńgege jetti. Bank qaryz portfeliniń ósim dınamıkasy sektordaǵy jalpy kólemnen 3 ese kóp. Ekinshi orynda – 948,5 mlrd teńgemen «Eýrazııalyq bank». Bul banktiń nesıe portfeline bir aıda 59,6 mlrd teńge qosylǵan. Úshinshi oryndy 45,7 mlrd teńge ósimmen Bank RBK túıindeıdi. Nesıe portfeliniń jalpy kólemi – 786,4 mlrd teńge. О́zge qarjy ınstıtýttary aılyq 1,1 paıyzdan 5,1 paıyzǵa deıingi aralyqta ósim kórsetken. Úzdik ondyq ishindegi nesıe portfelin azaıtyp alǵan jalǵyz qarjy ınstıtýty – «Sberbank Qazaqstan».
TOP-10 qataryna kirmeıtin basqa bankterdiń qaryz portfeliniń jıyntyq kólemi 1,4 paıyzǵa nemese 17,5 mlrd teńgege qysqarypty. Olardaǵy nesıe portfeliniń jıyntyq kólemi – 1,2 trln teńge.
«Jyl basynan beri ekinshi deńgeıli bankterdiń qaryz portfeli 5,5 paıyzǵa ósti. Qaryz portfeli kóleminiń ósýimen birge tólemi keshiktirilgen nesıe kólemi de 9 paıyzǵa nemese 2022 jyldyń maýsymynda 128,2 mlrd teńgege artty. Birinshi jartyjyldyq qorytyndysy boıynsha tólemi keshiktirilgen nesıe kólemi 1,6 trln teńgeni qurap, al merzimi ótken bereshek úlesi bir aıda 6,9-dan 7,3 paıyzǵa kóbeıdi», deıdi Ranking sarapshylary.
Bıznes salymdary boıynsha lıder – Bank RBK. Sońǵy bir aıda qarjy ınstıtýtyndaǵy korporatıvtik salym kólemi 26,9 paıyzǵa nemese 123,2 mlrd teńgege kóbeıip, jalpy jıyntyǵy 623,5 mlrd teńgege jetken. Bank mıkro jáne shaǵyn kásipkerler, sondaı-aq orta men iri bıznes úshin «Shuǵyl» jáne «Korporatıvtik» salymdar usynady. Salymdardy teńge, rýbl jáne dollarmen ashýǵa bolady. Korporatıvti salym kóleminiń aılyq ósimi boıynsha úzdik úshtikke Kaspi Bank (+24,1 paıyz, 453,6 mlrd teńge) jáne Qazaqstandaǵy Qytaı banki (+23,3 paıyz, 465,7 mlrd teńge) kirgen.
Jyldyń alǵashqy alty aıynda zańdy tulǵalardyń banktegi salymy 1,2 paıyzǵa ósken. Degenmen kúrdeli geosaıası jaǵdaıǵa qaramastan bankter korporatıvti sektordan 1 trln teńgeden astam qarajat tartyp otyr. Maýsymda ekinshi deńgeıli bankterdegi zańdy tulǵalar salymy 8,9 paıyzǵa kóbeıip, 12,7 trln teńgeni qurady.