Byltyr asa jeńil salmaq dárejesinde óner kórsetken beldi balýan, Rıo Olımpıadasy men álem chempıonatynyń eki dúrkin qola júldegeri Otgonseseg Galbadrah úlken sporttan qol úzgennen keıin «Endi jýyq arada oǵan laıyqty izbasar tabyla qoıar ma eken?» dep qobaljyǵanymyz ras. Iá, Mońǵolııadan qonys aýdaryp kelgen qarshyǵadaı qyz birneshe jyl boıy Qazaqstannyń áıelder dzıýdosyn jalǵyz ózi órge súıregenin jankúıerler jaqsy biledi. Biraq qobaljýymyz beker eken. Sońǵy kezderi dál sol 48 kılo salmaqta Ábıba Ábýjaqynova óreli ónerimen kózge túsip júr. Ol jýyrda Nur-Sultanda ótken qurlyqtyń basty dodasynda kúmis medal ıelendi. Atalǵan jarys aıaqtalǵannan soń onymen az-kem áńgimelesken edik.
– Ábıba, áýeli ózińdi «Egemen Qazaqstan» gazetiniń qalyń oqyrmandarymen jaqynyraq tanystyra ketseń.
– Men 1997 jyly О́zbekstannyń Tashkent oblysyna qarasty Shyrshyq qalasynda dúnıege keldim. Balaýsa shaǵymda anam kórkem gımnastıkaǵa berdi. Bir jyldaı jattyqqan soń ózimniń qalaýym boıynsha dzıýdoǵa aýystym. Áý basta áke-sheshem bul tańdaýymdy quptamady. «Qyz balaǵa alysyp-julysý jaraspaıdy. Bir jerińdi zaqymdap alasyń», dep qarsylyq bildirdi. Biraq men alǵan betimnen qaıtpaı, jattyǵýymdy jalǵastyra berdim. Osy ónerdiń qyr-syryn О́zbekstanda turatyn qazaq bapkeri Baqytjan Jumanovtan úırendim. Ýaqyt oza túrli jarysqa qatysyp, júldeli oryndardy ıelene bastadym. Sol kezde ǵana ata-anamnyń kóńilderi jibip, maǵan aq batalaryn berdi.
– Qazaqstanǵa qaı kezde qonys aýdardyńdar?
– 2014 jyly shekara asyp, Shymkent qalasyna qonystandyq. Áke-sheshem sol jaqta qaldy, men Almatyǵa atbasyn buryp, respýblıkalyq sport kolledjine oqýǵa tústim. Ol jerde kezinde Azııa oıyndary men qurlyq chempıonatynda júldeger atanǵan tanymal dzıýdoshy, bilikti bapker Nurbol Súleımenovten tálim-tárbıe aldym. Qazirgi kezde Atyraý qalasynda Meıirjan Esmaǵambetovtiń qol astynda jattyǵamyn.
– Alǵash ret sen 2017 jyly Horvatııanyń astanasy – Zagrebte ótken jastar arasyndaǵy álem birinshiliginde jarq etip kózge túsip, kúmis medal ıelendiń. Sol jarys jaıynda áńgimelep berseń.
– Zagrebte bes kezdesý ótkizip, Horvatııa, Reseı, Belgııa jáne Brazılııanyń balýandaryn jeńdim. Fınalda ózimniń jibergen óreskel qateligimniń saldarynan japon qyzyna ese jiberdim. Sol jarysta men tik turyp kúresý barysynda qarsylastaryma «aýyrtý» ádisin sátti qoldanyp, kópshiliktiń nazaryn ózime aýdardym. Ondaı tásildi ekiniń biri jasaı bermeıtin. Alaıda japonııalyq sportshynyń boıy tym alasa bolǵandyqtan, oǵan qarsy bul ádisim ótpedi. Osylaısha, kúmis medaldi qanaǵat tutýyma týra keldi. Keıinnen bul ádisti asa qaýipti dep sanap, dzıýdo kúresinen alyp tastady.
– Byltyr Bishkekte ótken Azııa chempıonatynda Qazaqstannyń balýandary bar-joǵy úsh júldege ıelik etti. Eldos Jumahanov pen Sevara Nyshanbaeva qola medal enshilese, jalǵyz sen ǵana fınalǵa shyqtyń. Sheshýshi tusta jeńiske jetýińe ne kedergi boldy dep oılaısyń?
– Qarsylastarymdy tegisteı utyp kele jatyp, aqtyq synda Lı Iаnanmen beldestim. Qytaı dzıýdoshysy oǵan deıin qurlyq chempıony atanyp, Grand Slem men Gran-prı jarystarynda birneshe márte jeńis tuǵyryna kóterilgen. Iаnandy jeńip jatyp, qatelikke boı aldyrdym. Ol óz múmkindigin múlt jibergen joq.
– Bishkekte jeńip alǵan kúmis medalińdi Nur-Sultanda altynǵa aıyrbastaǵyń kelgen shyǵar...
– Iá, ondaı oı boldy. Bıylǵy Azııa chempıonatynda taıpeılik Lın Chen-Hao men mońǵolııalyq Naranseseg Ganbaatardy jeńgen soń fınalda Vakana Kogamen kúsh synastym. Bul balýannyń esimi jankúıerlerge jaqsy tanys. Ol 2019 jyly jastar arasynda álem chempıony atanyp, byltyr Býdapeshtte ótken áıelderdiń dúnıejúzilik dodasynda kúmis medal ıelendi. Negizi ony jeńýge bolatyn edi. Sebebi men solaqaımyn. Solaqaı balýandarmen beldeskende Koganyń biraz qıpaqtap qalatynyn jaqsy bilemin. Biraq sheshýshi tusta meniń josparym júzege aspady. Abaısyzda onyń qaqpanyna túsip qaldym. Osylaısha, qatarynan ekinshi jyl Azııa chempıonatynyń kúmis medalin qanaǵat tuttym.
– Áńgimeńe kóp rahmet, Ábıba. Aldaǵy jarystarda saǵan sáttilik tileımiz.
– Sizge de kóp rahmet! Buıyrtsa, bıyl Tashkentte shy- myldyǵy túriletin álem chempıonatynda jeńis tuǵyryna kóterilý úshin barymdy salamyn. Baıraqty básekelerde meniń altynnan alqa taǵatyn kúnderim áli alda dep oılaımyn.
Áńgimelesken
Ǵalym SÚLEIMEN,
«Egemen Qazaqstan»