AQSh-tyń Sınsınnatı qalasyndaǵy týrnırdiń ekinshi aınalymynda qazaqstandyq tennısshi Elena Rybakına ıspanııalyq Garbıne Mýgýrýsamen kezdesti.
Venesýelada týyp-ósip, keıinnen Pıreneı túbegine qonys aýdarǵan 28 jastaǵy Garbıne óziniń sporttyq karerasynda WTA dodalarynda 10 márte dara shyqqan. 2016 jyly Rolan Garros jáne 2017 jyly Ýımbldonnyń bas júldesin oljalap, 2020 jyly Aýstralııanyń ashyq birinshiliginiń fınalynda oınady. Kezinde onyń álemdik reıtıngte kósh bastaǵany da esimizde. Buǵan deıin aıtýly tennısshiler ózara eki márte kúsh synasty. Byltyrǵy jyldyń maýsym aıynda Berlınde uıymdastyrylǵan týrnırde 6:4, 6:3 esebimen Ispanııanyń ókili utqan. Arada bir aıdan asa ýaqyt ótkende eki myqtynyń joly Tokıo Olımpıadasynda qıysty. Ol básekede jerlesimizdiń joly boldy – 7:5, 6:1.
Ekinshi kezeńde Elena Rybakına óte jaqsy óner kórsetti. Alǵashqy setti ol 6:3 esebimen aıaqtasa, ekinshisi taı-breıkke deıin ulasty. Sheshýshi tusta shıraq qımyldaǵan otandasymyz bul básekede de basymdyq tanytty – 7:6. Bul oıyn 1 saǵat 15 mınýtqa sozyldy. Úshinshi aınalymda Rybakına álemniń 28 raketkasy, amerıkalyq Elıson Rıskemen kezdesedi.